पुणे-नाशिक रेल्वेला खोडा, खेडमध्ये लष्कराचा आक्षेप; नव्या जागेबाबत विचार
पुणे | पुणे-नाशिक हायस्पीड रेल्वे प्रकल्पाच्या खेड तालुक्यातील कामाला संरक्षण विभागाने खोडा घातला आहे. यामुळे येथील काम तूर्त थांबविण्यात आले आहे. खेड तालुक्यात लष्कराच्या जागेतून हा प्रकल्प जात असल्याने त्याला आक्षेप घेण्यात आला आहे. परिणामी, पर्यायी गावांमधील जागा संपादित करण्याबाबत जिल्हा प्रशासन विचार करीत आहे.
रेल्वे मंत्रालय, राज्य सरकारचा एकत्रित उपक्रम असलेल्या महाराष्ट्र रेल्वे पायाभूत सुविधा विकास कंपनी (महारेल) मार्फत पुणे-नाशिक हायस्पीड रेल्वे मार्गाची उभारणी करण्यात येत आहे. या प्रकल्पाच्या भूसंपादनाचे काम सध्या सुरू आहे. परंतु, संरक्षण विभागाकडून खेड तालुक्यातील कामाला आक्षेप घेण्यात आल्याने काम थांबले आहे.
जमिनीबाबत लवकरच तोडगा
जिल्हाधिकारी डॉ. राजेश देशमुख म्हणाले, ‘संरक्षण विभागाकडून प्रकल्पाच्या खेड येथील आखणीला आक्षेप घेण्यात आला आहे. खेड तालुक्यात लष्कराचे स्फोटक नष्ट करण्याचे केंद्र असून, पुणे-नाशिक रेल्वे प्रकल्पामुळे त्याला बाधा येत आहे, असा आक्षेप घेण्यात आला आहे. रेल्वेकडून सविस्तर प्रकल्प अहवाल तयार करताना संरक्षण विभागाकडून याबाबत आक्षेप घेण्यात आला नव्हता. अचानक आक्षेप घेण्यात आल्याने तूर्त तेथील काम थांबविले आहे. पर्यायी गावांमधील जमीन घेण्याचा प्रशासनाकडून प्रयत्न सुरू आहे. याबाबत लवकरच तोडगा काढला जाईल.’
पुणे नाशिक हायस्पीड रेल्वेची वैशिष्ट्ये
– हा रेल्वे मार्ग पुणे, नगर, नाशिक जिल्ह्यांतून प्रस्तावित.
– पुणे जिल्ह्यातील हवेली, खेड, आंबेगाव, जुन्नर या चार तालुक्यांतील एकूण ५४ गावांचा समावेश.
– जिल्ह्यात पुणे या पहिल्या स्थानकासह हडपसर, मांजरी, वाघोली, आळंदी, चाकण, राजगुरुनगर, मंचर, नारायणगाव, आळेफाटा या स्थानकांचा समावेश.
– प्रमुख स्थानकांपैकी चाकण, मंचर आणि नारायणगाव ही स्थानके कृषी उत्पादन व खासगी मालवाहतूक टर्मिनल म्हणून उभारणार.
– राजगुरुनगर स्थानक फक्त प्रवासी रहदारीसाठी असणार.