‘जयश्रीताई, चांगलं काम करा; महाविकास आघाडी सरकार तुमच्यासोबत’, अजितदादांच्या शुभेच्छा
मुंबई | कोल्हापूर उत्तरच्या नवनिर्वाचित आमदार जयश्रीताई जाधव यांनी आज मंत्रालयात उपमुख्यमंत्री अजितदादा पवार यांची सदिच्छा भेट घेतली. जनतेने तुमच्यावर मोठा विश्वास दाखवला आहे. जनतेचा विश्वास सार्थ ठरविण्यासाठी चांगले काम करा, महाविकास आघाडीचे सरकार तुमच्यासोबत आहे, असा विश्वास देत अजितदादांनी जयश्रीताई जाधव यांचे अभिनंदन केले.
कोल्हापूर उत्तर विधानसभा मतदारसंघासाठी निधीची कमतरता भासू दिली जाणार नसल्याची ग्वाही देत जयश्रीताईंच्या विजयात मोलाचा वाटा उचलणाऱ्या महाविकास आघाडीतील सर्व नेत्यांचे अजित पवार यांनी अभिनंदन केले. यावेळी ग्रामविकास मंत्री हसन मुश्रीफ, उच्च व तंत्र शिक्षणमंत्री उदय सामंत, मदत व पुनर्वसन मंत्री विजय वडेट्टीवार, गृह राज्यमंत्री सतेज पाटील, राज्य नियोजन मंडळाचे कार्यकारी अध्यक्ष राजेश क्षीरसागर, माजी आमदार मालोजीराजे छत्रपती उपस्थित होते.
कोल्हापूरच्या मैदानात भाजप चितपट, काँग्रेसने मैदान मारलं!
कोल्हापूर उत्तर विधानसभा मतदारसंघाची नुकतीच पोटनिवडणूक पार पडली. या पोटनिवडणुकीत काँग्रेसच्या जयश्री जाधव यांनी भाजप उमेदवार सत्यजीत नाना कदम यांना आस्मान दाखवलं. कोल्हापूरच्या इतिहासात पहिल्यांदाच महिला आमदार होण्याचा मान त्यांना मिळाला. जयश्री जाधव यांच्या विजयासाठी तिन्ही पक्षाच्या नेते, कार्यकर्त्यांनी जीवाचं रान केलं. प्रामुख्याने शिवसेना नेते राजेश क्षीरसागर आणि काँग्रसचे नेते बंटी पाटील यांनी दिवस रात्र एक करत जनतेपर्यंत पोहोचून जयश्री जाधव यांचा प्रचार केला. तिन्ही पक्षांच्या सामूहिक प्रयत्नांच्या जोरावर अखेर महाविकास आघाडीने भाजपला कोल्हापूरच्या मैदानात चितपट केलेच…!
