तुमचाही इतिहास मला माहित आहे; मुख्यमंत्र्यांचे धनंजय मुंडेंना चिमटे!
मुंबई : माजी मंत्री धनंजय मुंडे (Dhananjay Munde) यांच्या पत्नी असल्याचा दावा करणाऱ्या करुणा शर्मा (Karuna Sharme) विधानभवनात दाखल झाल्या आहेत. मुख्यमंत्री एकनाथ शिंदे (Eknath Shinde) यांची भेट घेण्यासाठी करुणा शर्मा विधिमंडळातील मुख्यमंत्री कार्यालयात आल्या. ‘तुमचाही इतिहास मला माहित आहे, त्यावेळी देखील आपल्या देवेंद्रजींनी थोडं प्रेम, दया, करुणा दाखवली’ असं म्हणत मुख्यमंत्री एकनाथ शिंदे यांनी धनंजय मुंडेंना चिमटे काढले होते. त्यानंतर शर्मा शिंदेंच्या भेटीला आल्या. या भेटीत दोघांमध्ये काय बातचित होते, शर्मा आपली नाराजी व्यक्त करणार का, याकडे राजकीय वर्तुळाच्या नजरा लागल्या आहेत.
मुख्यमंत्री काय म्हणाले होते?
‘धनंजय मुंडे एवढ्या जोरात घोषणाबाजी करत होते, की ते किती वर्षांचे शिवसैनिक आहेत, असं वाटत होतं. बेंबीच्या देठापासून ओरडून, तुमचा घसा खराब होईपर्यंत तुम्ही बोललात, आता तुमचा पण सगळा प्रवास मला माहिती आहे, त्यावेळी देखील आपल्या देवेंद्रजींनी थोडं प्रेम, दया, करुणा दाखवली, दाखवली ना? त्यामुळे थोडं…’ असं एकनाथ शिंदे म्हणाले. त्यानंतर विधिमंडळात खळखळाट झाला. शिंदेंच्या मागे बसलेले मंत्री संदिपान भुमरे हे अब्दुल सत्तार यांना गुद्दा घालत हसू लागले.
करुणा शर्मा यांच्या नावावरुन एकनाथ शिंदेंनी टोले लगावल्याचं स्पष्टच होतं. त्यामुळे सभागृहात सर्वांनाच हसू फुटलं. उपमुख्यमंत्री देवेंद्र फडणवीस यांच्या चेहऱ्यावर मात्र कुठलीच प्रतिक्रिया उमटली नाही.
कोण आहेत करुणा शर्मा?
धनंजय मुंडे यांची पत्नी असल्याचा दावा करुणा शर्मा यांनी काही महिन्यांपूर्वी केला होता. त्यांच्यापासून आपल्याला अपत्यप्राप्ती झाल्याचा दावाही करुणा यांनी केला होता. त्यानंतर धनंजय मुंडेंनी याचा स्वीकारही केला. करुणा शर्मा यांनी निवडणुकीच्या रिंगणात उतरण्याची तयारीही केली आहे.
करुणा शर्मा आणि धनंजय मुंडे यांची प्रेम कहाणी मराठीत येणार आहे. त्यावर काम सुरु असल्याचं करुणा शर्मा यांनी काही दिवसांपूर्वी म्हटलं होतं. यापूर्वी आमच्या दोघांवर सिनेमा काढल्यावर तो हिट होईल असे वक्तव्यही त्यांनी केले होते. आमच्या प्रेम-कहाणीवरचे पुस्तक अंतिम टप्यात असून त्यातून अनेक पुरावे समोर आणणार असल्याचे शर्मा यांनी सांगितलं होतं.
