पिंपरी l प्रतिनिधी
क्रेडिट कार बंद करण्यासाठी आणि त्यावरील चार्जेस रद्द करण्याचा बहाणा करून एका अनोळखी महिलेने एका व्यवसायिक महिलेच्या क्रेडिट आणि डेबिट कार्डवरून तब्बल आठ लाख 68 हजार 916 रुपये ट्रान्सफर करून घेतले. याप्रकरणी फसवणुकीचा गुन्हा दाखल करण्यात आला आहे. हा प्रकार मंगळवारी (दि. 1) दुपारी पिंपळे सौदागर येथे घडला.
मोनिका जॉयदीप डे (वय 42, रा. कुणाल आयकॉन, पिंपळे सौदागर) यांनी याप्रकरणी बुधवारी (दि. 2) सांगवी पोलीस ठाण्यात फिर्याद दिली आहे. त्यानुसार अनोळखी महिलेच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, मंगळवारी दुपारी फिर्यादी घरी असताना त्यांना एका अनोळखी महिलेचा फोन आला. त्या महिलेने सांगितले की, ‘तुम्ही वापरत असलेच्या आयसीआयसीआय बँकेच्या क्रेडिट कार्डला बँकेने वार्षिक चार्ज लावले आहेत. तेंव्हा तुमचे कार्ड बंद करण्यासाठी आणि त्यावरील चार्जेस रद्द करण्याचा बहाणा करत अनोळखी महिलेने फिर्यादी यांच्या क्रेडिट कार्डवरून 69 हजार 639 रुपये, 91 हजार 53 रुपये, 96 हजार 174 रुपये, 99 हजार 990 रुपये आणि 96 हजार 109 असे चार लाख 52 हजार 965 रुपये ट्रान्सफर करून घेतले. त्यानंतर आरोपी महिलेने फिर्यादी यांच्या बचत खात्यावरून चार लाख 15 हजार 951 रुपये ट्रान्सफर करून घेतले. एकूण आठ लाख 68 हजार 916 रुपये ट्रान्सफर करून घेत आरोपी महिलेने फिर्यादी यांची फसवणूक केली. पोलीस निरीक्षक सुनील तांबे तपास करीत आहेत.
