नंबर प्लेट नसल्याने चारचाकी तपासणीसाठी थांबवली, पुढे जे घडलं ते धक्कादायकच…

असा आला संपूर्ण प्रकार उघडकीस…

चाळीसगाव ग्रामीण पोलीस स्टेशनचे वाहतूक शाखेचे कर्मचारी सोमवारी सायंकाळी चाळीसगाव-धुळे रस्त्यावर नाकाबंदी करत वाहनांची तपासणी करत होते. यादरम्यान धुळ्याहून चाळीसगावकडे जात असलेली एक विना नंबरची स्कार्पिओ गाडी आली. नंबर प्लेट नसल्याने या चारचाकीला कारवाईसाठी पोलिसांनी थांबवले. यावेळी चालक टाळाटाळ करायला लागला. संशय आल्याने पोलिसांनी वाहनातील व्यक्तींची व वाहनाची चौकशी केली. चार चाकीत चार गोण्यामध्ये भरलेला ५८ किलो २०० ग्राम एवढा ८ लाख ७२ हजार रुपये किमतीचा गांजा मिळून आला. गांजा, चार चाकी वाहन, चारचाकीत बसलेल्या दोघांकडील मोबाईल व रोकड असा एकूण १३ लाख ३६ हजारांचा मुद्देमाल पोलिसांनी जप्त केला आहे. व तुषार अरूण काटकर (वय-२८ रा. दत्तवाडी ता. चाळीसगाव) व सुनिल देविदास बेडीस्कर (वय-३८ रा. पिलखोड ता. चाळीसगाव) या दोघांना ताब्यात घेतले आहे.

याप्रकरणी चाळीसगाव शहर वाहतूक शाखेचे सहाय्यक पोलीस निरीक्षक तुषार देवरे यांच्या फिर्यादीवरून चाळीसगाव ग्रामीण पोलीस स्थानकात गुन्हा दाखल करण्यात आला आहे. पोलिस अधीक्षक डॉ. प्रविण मुंढे, अप्पर पोलीस अधीक्षक रमेश चोपडे, उपविभागीय अधिकारी कैलास गावडे व पोलिस निरीक्षक संजय ठेंगे यांच्या मार्गदर्शनाखाली शहर वाहतूक शाखेचे तुषार देवरे, पोलीस नाईक सचिन देविदास अडावदकर, बापू काशिनाथ पाटील, दिपक पितांबर पाटील आदींच्या पथकाने ही कारवाई केली. या कारवाईने चाळीसगाव शहरासह संपूर्ण जिल्ह्यात एकच खळबळ उडाली आहे. नेमका गांजा कोणत्या ठिकाणी जात होता यात आणखी कोणा कोणाचा सहभाग आहे हे पोलिसांच्या तपासात समोर येणार आहे.