पारधी गुन्हेगाराचा मृत्यू : वरिष्ठ पोलीस निरीक्षकांसह सहा जणांवर गुन्हा दाखल!

सोलापूर : दरोडा व जबरी चोरीच्या गुन्ह्यातील पारधी समाजातील आरोपी भीमा काळे याच्या मृत्यूस कारणीभूत ठरल्याचा ठपका ठेवत, गुन्हे अन्वेषण विभागाने फौजदार चावडी पोलीस ठाण्याचे पोलीस निरीक्षक उदयसिंह पाटील, सहाय्यक पोलिस निरीक्षक शीतलकुमार कोल्हाळ यांच्यासह पाच पोलिसांवर गुन्हा दाखल केला आहे.

आरोपीच्या पत्नी आणि मुलांनी केला होता आरोप

आरोपी भीमा काळे याच्या मृत्यूनंतर त्याची पत्नी आणि मुलांनी सिव्हिल हॉस्पिटलमध्ये थेट पोलिसांवर आरोप केला होता. सिद्रामप्पा गजा, पोलीस उपअधिक्षक गुन्हे अन्वेषण विभाग सोलापूर यांनी दाखल केलेल्या फिर्यादीवरुन वपोनि उदयसिंह शामराव पाटील, सपोनि शितलकुमार मारुती कोल्हाळ, पोहेकॉ श्रीरंग तुकाराम खांडेकर, पोना शिवानंद दत्तात्रय भिमदे, पोना अंबादास बालाजी गड्डुम, पोशि अतिश काकासाहेब पाटील, पोना लक्ष्मण पोमु राठोड या 7 जणांविरुद्ध भादंवि संहिता कलम ३०४, ३३०, १६६, ३४ नुसार विजापूर नाका पोलीस ठाण्यात गुन्हा दाखल करण्यात आला आहे.

विजापूर नाका पोलीस ठाणे अंतर्गत भादवि संहिता कलम ४५४, ४५७, ३८० या गुन्हयातील आरोपी भिमा रज्जा काळे (वय ४२ वर्षे, रा. भांबुरे पारधी वस्ती, कुर्डुवाडी, ता.माढ) यास २२ सप्टेंबर २०२१ रोजी जिल्हा कारागृह सोलापूर येथुन कोल्हाळ यांनी वर्ग करुन ताब्यात घेवून न्यायालयाकडून त्याची २२ ते २५ सप्टेंबर २०२१ पर्यंत पोलीस कस्टडी घेत रिमांड मंजुर करुन घेतलेली होती.

या पोलीस कस्टडीत असताना आरोपीस सर्दी, ताप, खोकला व उलटया होत असल्याने व दोन्ही पायास संसर्ग झाल्यामुळे व त्याचे दोन्ही पाय सुजल्याने त्यास उपचाराकरीता सिव्हील हॉस्पीटल सोलापूर ये २४ सप्टेंबर ला २०२१ रोजी मेडीकल यादीसह कोल्हाळ तत्कालीन नेम विजापूर नाका पोलीस ठाणे सोलापूर शहर यांनी उपचारास दाखल केले असता, त्याच्यावर उपचार चालु असताना आरोपीचं भिमा रज्जा काळे याचे हा ३ऑक्टोबर २०२१ च्या रात्री निधन झाल्याने विजापूर नाका पोलीस ठाणे अ.म.र.नं. १११/२०२१ सी आर पी सी कलम १७४ प्रमाणे मयत दाखल करण्यात आली होती.

आरोपीस वैदयकीय उपचाराची आवश्यकता असताना त्याकडे जाणीवपूर्वक दुर्लक्ष केले

सदर मयताच्या झालेल्या तपासावरून त्याने गुन्हा कबुल करावा व गुन्हयातील चोरीस गेलेला माल काढुन दयावा म्हणून त्यास गुन्हयाचे तत्कालीन तपासी अधिकारी सपोनि कोल्हाळ, पोहवा श्रीरंग तुकाराम खांडेकर, पोना शिवानंद दत्तात्रय भिमदे, पोना अंबादास बालाजी गड्डम, पोशि अतिश काकासाहेब पाटील, व पोना लक्ष्मण पोमु राठोड यांनी पोलीस कस्टडीतील आरोपीस मारहाण केली तसेच विजापूर नाका पोलीस ठाण्याचे तत्कालीन पोलीस निरीक्षक उदयसिंह शामराव पाटील यांनी वि. ना.पो.ठाणे गु.र.नं. ३९५ / २०२१ कलम ४५४,४५७,३८० भादविसं या गुन्हयातील तपासी अधिकारी सपोनि कोल्हाळ यांना गुन्हयाच्या तपासामध्ये मार्गदर्शक सुचना दिलेचे दिसुन आले नाही. शिवाय दि. २२सप्टेंबर २०२१ रोजी रात्री ८.०० वा चे सुमारास तपासीक अधिकारी यांनी यातील आरोपी भीमाला त्यांच्या समक्ष हजर केले असता आरोपी हा लंगडत असल्याचे व त्याचे दोन्ही पाय काळसर दिसत असल्याचे निदर्शनास येवूनसुध्दा आरोपीस वैदयकीय उपचाराची आवश्यकता असतानासुध्दा त्याकडे जाणीवपूर्वक दुर्लक्ष केले.

पुढील तपास गुन्हे अन्वेषण विभाग भरारी पथक पुणे करत आहे…

त्यामुळे सर्वोच्च न्यायालय व उच्च न्यायालयांच्या मार्गदर्शक सूचनांप्रमाणे पोलीस ठाणे आवारात व प्रत्येक कक्षात सीसीटिव्ही कॅमेरे सुस्थितीत ठेवून त्याची छायाचित्रण जतन करण्याचे प्रशासकीय जबाबदारी पोलीस ठाणे प्रभारी अधिकारी यांच्यावर येते, परंतु विजापूर नाका पोलीस ठाणे येथील गुन्हे प्रकटीकरण कक्षात सीसीटिव्ही कॅमेरा असने आवश्यक असताना सदर ठिकाणी उपलब्ध केला नाही.वरील आरोपीत मजकूर यांनी वि. ना. पो. ठाणे गु.र.नं. ३९५ / २०२१ मधील आरोपीत भिमा रज्जा काळे (मयत) यास केलेल्या मारहाणीमुळे झालेल्या जखमांकडे तसेच सदरील मयत ही मानसिकदृष्ट्या सक्षम नसल्याचे माहित असतानाही त्याची वैद्यकीय आजारपणे व मारहाणीमुळे झालेल्या जखमांवर जाणीवपूर्वक दुर्लक्ष करुन तात्काळ वैद्यकीय मदत न पुरवता त्याच्या मृत्यूस कारणीभूत झाले. या प्रकरणाचा पुढील तपास डीवायएसपी जी व्ही दिघावकर, गुन्हे अन्वेषण विभाग भरारी पथक पुणे हे करीत आहेत.