#CoronaVirus: प्रवासी हवाई वाहतूक ३ मेपर्यंत बंद!
पंतप्रधान नरेंद्र मोदी यांनी करोनाचा प्रसार रोखण्यासाठी टाळेबंदीची मुदत ३ मेपर्यंत वाढवल्यानंतर आता नागरी हवाई वाहतूक मंत्रालयानेही ३ मे पर्यंत देशांतर्गत व आंतरराष्ट्रीय विमान सेवा बंद ठेवण्याचा निर्णय घेतला आहे. देशांतर्गत व आंतरराष्ट्रीय व्यावसायिक विमान सेवा याआधी २५ मार्च ते १४ एप्रिल या काळात बंद ठेवण्यात आली होती. हवाई वाहतूक मंत्रालयाने म्हटले आहे, की आता यापुढेही ३ मे रोजी रात्री ११.५९ पर्यंत देशांतर्गत व आंतरराष्ट्रीय विमान सेवा बंद राहील. हवाई वाहतूक मंत्री हरदीप सिंग पुरी यांनी सांगितले, की ३ मेपर्यंत टाळेबंदी वाढवण्यात आली त्याला पुरेशी कारणे आहेत. ३ मे नंतर राष्ट्रीय व आंतरराष्ट्रीय विमानसेवेवरची बंदी उठवण्याचा विचार करण्यात येईल. ज्या लोकांना प्रवाशाची गरज आहे त्यांची निकड आम्ही समजू शकतो पण त्यांना काही काळ गैरसोय सहन करावी लागणार आहे.