#CoronaVirus: ज्येष्ठ शिवसैनिकाला कोरोना विषाणूची लागण, शिवसेना भवनातील दैनंदिन व्यवहार काही दिवस बंद राहणार
मुंबई: शिवसेना भवनातील दैनंदिन व्यवहार काही दिवसांसाठी बंद ठेवण्यात येणार आहेत. शिवसेना भवनात नियमित येणाऱ्या एका ज्येष्ठ शिवसैनिकाला कोरोनाची लागण झाल्यामुळे हा निर्णय घेण्यात आलेला आहे. कोरोनाची लागण झालेला शिवसैनिक पक्षाच्या एका खासदाराचा निकटवर्तीय आहे.
कोरोनाची लागण झालेला शिवसैनिक नियमित शिवसेना भवनमध्ये येत असतो. शिवसैनिकाला कोरोनाची लागण झाल्यानंतर कालपासून निर्जंतुकीकरणासाठी पुढचे काही दिवस शिवसेना भवनातील दैनंदिन व्यवहार बंद ठेवण्यात आलेले आहेत. नेते-पदाधिकारी-कार्यकर्त्यांना काही दिवस शिवसेना भवनात न येण्याच्या सूचनाही पक्षाकडून देण्यात आलेल्या आहेत.
नुकतेच शिवसेना भवनमध्ये पक्षाचा 54 वा वर्धापन दिन साजरा करण्यात आला होता. यावेळी पक्षप्रमुख आणि मुख्यमंत्री उद्धव ठाकरे, पर्यावरण मंत्री आदित्य ठाकरे यांच्यासह अनेक नेते आणि पदाधिकारीही उपस्थित होते. दरम्यान, आतापर्यंत शिवसेनेतील अनेक नगरसेवकांनाही कोरोनाची लागण झाल्याचे समोर आले आहे. आता तर थेट शिवसेना भवनामध्ये कोरोनाचा शिरकाव झाल्याने आतमध्य़े काम करणाऱ्यांमध्ये भीतीचं वातावरण निर्माण झालेले आहे.