#CoronaVirus: खासदार नवनीत कौर राणा यांच्या कुटुंबातील सात जणांना कोरोनाची लागण
अमरावती: अमरावतीच्या खासदार नवनीत कौर राणा आणि बडनेरा मतदारसंघाचे आमदार रवी राणा यांच्या कुटुंबातील सात जणांना कोरोनाची लागण झालेली आहे. नवनीत राणा यांच्या सासऱ्यांपाठोपाठ आणखी सहा जणांचे कोरोना रिपोर्ट पॉझिटिव्ह आलेले आहेत. आमदार रवी राणा यांचे वडील, म्हणजेच नवनीत कौर राणा यांचे सासरे गंगाधर राणा यांचा कोरोना रिपोर्ट काल दुपारी (रविवार 2 ऑगस्ट) पॉझिटिव्ह आलेला होता. त्यानंतर राणा दाम्पत्य, त्यांची मुले आणि कुटुंबातील इतर सदस्य, कार्यकर्ते अशा जवळपास 50 ते 60 जणाची कोरोना चाचणी घेण्यात आली आहे. आमदार रवी राणा यांच्या वडिलांसोबतच आई, बहीण, बहिणीचे पती, भाचा, पुतण्या अशा एकूण सात जणांना कोरोनाची लागण झाल्याचे समोर आले आहे.
आमदार रवी राणा यांच्या घराचा संपूर्ण परिसर सॅनिटाईज करण्यात आला आहे. “अमरावती येथील आरोग्य यंत्रणा पार ढासळली आहे. कोव्हिड रुग्णांचे हाल होत आहेत. कोव्हिड तपासणी करणाऱ्या खाजगी, कंत्राटी व्यक्तींची पार्श्वभूमी तपासून पाहली पाहिजे” असा आरोप खासदार नवनीत राणा यांनी काही दिवसांपूर्वी केलेला होता. ‘कोरोना’च्या पार्श्वभूमीवर आमदार रवी राणा यांनी सॅनिटायझर, मास्क आणि धान्य वाटण्यासाठी एप्रिल महिन्यात दौरे केलेले होते. नवनीत कौर राणाही यामध्ये सहभागी झालेल्या होत्या. त्यावेळी (एप्रिल महिन्यात) रवी राणा यांना 103-104 या श्रेणीत ताप आला होता. त्यामुळे त्यांच्या शरीरभर असह्य वेदना जाणवू लागल्या होत्या. तेव्हा त्यांना खासगी रुग्णालयात अॅडमिट करण्यात आले होते, परंतु त्यांना कोरोनाची लागण झालेली नव्हती.