कारवाई करण्यापूर्वी आमच्याशी संपर्क करा; टॉयलेट घोटाळ्याचा आरोप होताच सोमय्यांचे पत्र

संजय राऊतांच्या आरोपांनंतर किरीट सोमय्यांनी हे आरोप फेटाळले असून या आरोपात काही तथ्य नसल्याचं म्हटलं होतं. त्यानंतर आता सोमय्या यांनी पुढचे पाऊल टाकत नगरविकासाचे प्रधान सचिव भूषण गगराणी यांनी पत्र लिहलं आहे. कोणतीही कारवाई करण्यापूर्वी आमच्याशी संपर्क करा, असं सोमय्यांनी या पत्रात नमूद केलं आहे.
टॉयलेट घोटाळ्याचे आरोप राजकीय हेतूने करत आहेत. त्याची आम्ही गंभीर दखल घेतो. यासंबधी कोणत्याही प्रकारची कारवाई करण्यापूर्वी या संपूर्ण उपरोक्त गोष्टीचा पुन्हा एकदा विचार करावा, आवश्यकता असल्यास आमच्याशी संपर्क करावा, आम्हीही संबंधित माहिती द्यायला तयार आहेत, असं सोमय्या यांनी पत्रात नमूद केलं आहे. राजकीय किंवा अन्य दडपणाखाली सोमय्या परिवाराच्या विरोधात गुन्हा नोंदवायचा अशा प्रकारची कृती अधिकारी वर्ग करणार नाही, असा विश्वास व्यक्त करतो, असंही सोमय्यांनी पत्रात नमूद केलं आहे.

• संजय राऊत काय म्हणाले?

सोमय्या यांची पत्नी मेधा सोमय्या या युवा प्रतिष्ठानचा कारभार पाहतात. त्यांनी हा घोटाळा केला असून, त्याचे पुरावे आणि अहवाल कुठे आहे, हे सोमय्या कुटुंबीयांनाही माहिती आहे, असा दावा राऊत यांनी केला. १०० कोटींच्या टॉयलेट घोटाळ्यात युवा प्रतिष्ठानकडून खोटी बिले तयार करून पैसे लाटण्यात आले, असा आरोप संजय राऊत यांनी केला होता.