Buldhana: ईदला गालबोट, नमाज पठणावेळी दोन गटात हाणामारी, तरुणाचा मृत्यू
बुलडाणा: बावनबीर येथे ईदगाह परिसरात झालेल्या तुफान हाणामारीत एका २७ वर्षीय तरुणाचा मृत्यू झाला आहे. शेख रफीक शेख गणी (वय 27) असं या तरुणाचं नाव आहे. याप्रकरणी पोलिसांनी ५ जणांना अटक केली आहे. यानंतर काहीही अनुचित घडू नये म्हणून पोलिसांनी मुस्लिम बांधवांना शांतता पाळण्याचं आवाहन केलं आहे. मात्र, ईदच्या सणाला तरुणाचा मृत्यू झाल्याने परिसरात हळहळ व्यक्त होत आहे.
संग्रामपूर तालुक्यातील बावनबीर येथील टुनकी मेन रोडवर जुन्या वादातून हाणामारीची घटना घडली. आज ईदच्या दिवशी सकाळी साडे सात वाजताच्या सुमारास ईदगाह परिसरात ही घटना घडल्याची माहिती आहे.
नमाज पठणाला जाताना दोन गटात हाणामारी
आज रमजान ईद निमित्त गावातील समस्त मुस्लिम बांधव नमाज पठण करण्याकरिता जात होते. तेव्हा अचानक दोन गटातील व्यक्तींनी एकामेकांना मारहाण करण्यास सुरूवात केली. या मारहाणीत शेख रफीक शेख गणी हा गंभीर जखमी झाला. त्यानंतर त्याला रुग्णालयात दाखल करण्यात आले. मात्र, तिथे उपचारादरम्यान त्याचा मृत्यू झाला.
ईदगाह परिसरात तुफान हाणामारी सुरू असल्याची माहिती पोलिसांना मिळाली. त्यानंतर ठाणेदार श्रीधर गुट्टे यांनी तात्काळ घटनास्थळ गाठत परिस्थितीवर नियंत्रण मिळवले. मारहाण झालेल्या ठिकाणी उपस्थित पोलीस आणि ग्रामस्थ यांनी दोन्ही गटाच्या नागरिकांना शांततेचे आवाहन केले. घटनेतील आरोपी व्यक्तींना पोलिसांनी ताब्यात घेतले आहे.
