साखरपुड्यात चिकन करी न दिल्यानं वर-वधूपक्षाकडील पाहुण्यांमध्ये तुंबळ हाणामारी; एकाची हत्या
![](https://mahaenews.com/wp-content/uploads/2018/04/sexual-assault.jpg)
हैदराबाद- साखरपुड्याच्या समारंभात नातेवाईकांना चिकन करी न दिल्यानं वर आणि वधूपक्षाकडील पाहुण्यांमध्ये तुंबळ हाणामारी झाली. यात एकाचा मृत्यू झाला. हैदराबादमध्ये सोमवारी ही घटना घडली. अन्वर असं मृताचं नाव असून, तो नवरदेवाचा चुलत भाऊ असल्याचं सांगण्यात येतं.
या प्रकरणी पोलिसांनी काही आरोपींना अटक केली आहे. त्यांच्या विरोधात हुसैनीआलम पोलीस ठाण्यात गुन्हा दाखल करण्यात आला आहे. मिळालेल्या माहितीनुसार, या भांडणात एकूण आठ जण सामील होते. त्यातील चार जणांवर अन्वरच्या हत्येचा आरोप ठेवण्यात आला आहे.
‘रात्री १ वाजण्याच्या सुमारास ही घटना घडली. वेटरनं अश्फाक आणि त्याच्या मित्रांना चिकन करी देण्यास नकार दिला. यावरून वाद झाला. नवरदेवाचा चुलत भाऊ अन्वरनं वाद मिटवण्याचा प्रयत्न केला. त्यावेळी अशफाक, त्याचा भाऊ आणि मित्रांनी अन्वरवर हल्ला केला. यात जखमी झालेल्या अन्वरचा मृत्यू झाला,’ अशी माहिती पोलिसांनी दिली.