दिल्ली : भारतीय कुस्ती महासंघाचे (WFI) माजी अध्यक्ष ब्रिजभूषण शरण सिंग आणि इतर प्रशिक्षकांनी महिला कुस्तीपटूंचे लैंगिक शोषण केल्याचा आरोप बजरंग पुनिया, साक्षी मलिक आणि विनेश फोगट यांनी केला होता. जानेवारीमध्ये त्यांनी जंतरमंतरवर जाऊन आंदोलनही केलं होतं. मात्र तरी देखील अद्याप कोणतीही कारवाई न झाल्यामुळे भारतीय कुस्ती संघातील कुस्तीपटू पुन्हा आंदोलन करत आहेत. जोपर्यंत ब्रिजभूषण सिंग यांना अटक होत नाही तोपर्यंत हटणार नाही, अशी भूमिका त्यांनी घेतली आहे.
कुस्तीपटू साक्षी मलिक म्हणाली की, तक्रारीवर आधारित प्रथम माहिती अहवाल अद्याप दाखल करणे बाकी आहे. या प्रकरणावरील सरकारी पॅनेलचा अहवाल अद्याप सार्वजनिक करणे बाकी आहे. महिला पैलवानांच्या विधानांचा समावेश असलेला अहवाल सार्वजनिक व्हावा अशी आमची इच्छा आहे. हा एक संवेदनशील मुद्दा आहे आणि तक्रारकर्त्यांपैकी एक अल्पवयीन मुलगी आहे. तक्रारकर्त्यांची नावे उघड करू नयेत.
विविध महिला कुस्तीपटू ज्यांनी या देशाचे नाव कमावले आहे त्यांचे WFI चे अध्यक्ष ब्रिजभूषण शरण सिंह यांनी लैंगिक शोषण आणि छळ केला आहे. २१ एप्रिल २०२३ रोजी तक्रारी असूनही, दिल्ली पोलिस एफआयआर नोंदवत नाहीत, असे ट्विट मध्ये विनेशने आदल्या दिवशी म्हटले आहे.
तीन महिने झाले तरी आम्हाला न्याय मिळालेला नाही. म्हणूनच आम्ही न्याय मागण्यासाठी परतलो आहोत. न्याय मिळेपर्यंत आम्ही इथेच झोपू आणि खाऊ, असं विनेशने म्हटलं आहे.
