पुणे | अल्पवयीन मुलीवर बलात्कार केल्यानंतर त्यातून गर्भधारणा झाली आहे, असे सांगून एका तरुणाकडून ६७ लाख रुपयांची खंडणी उकळण्यात आली. मैत्रीच्या आमिषात (हनी ट्रॅप) अडकवून तरुणी आणि साथीदारांनी तरुणाला लुटले. अनोळखी तरुणीशी झालेली ओळख तरुणाच्या अंगलट आली. या प्रकरणात एका तरुणीसह तिघांच्या विरुद्ध कोंढवा पोलिस ठाण्यात गुन्हा दाखल करण्यात आला असून, दोघांना अटक करण्यात आली आहे.
चेतन रवींद्र हिंगमिरे (रा. काळेपडळ हडपसर), निखिल ऊर्फ गौरव ज्ञानेश्वर म्हेत्रे (रा. गाडीतळ, हडपसर) अशी अटक करण्यात आलेल्या आरोपींची नावे आहेत. याबाबत एका २६ वर्षीय तरुणाने फिर्याद दिली आहे. फिर्यादी तरुण चुलत भावाच्या खडी मशीन कंपनीत पर्यवेक्षक म्हणून काम करतो. तरुणाकडे खडी मशीनचे आर्थिक व्यवहार आहेत. गेल्या वर्षी जानेवारी महिन्यात तो नगर रस्त्यावरील कोरेगाव भीमा परिसरात गेला होता. त्या वेळी तेथील एका लॉजवर तो मुक्कामासाठी थांबला होता. एकाने त्याला तरुणीचा मोबाइल क्रमांक देऊन संपर्क साधण्यास सांगितले. तक्रारदार तरुण आणि तरुणीची ओळख झाली. दोघे जण बोपदेव घाट परिसरात भेटले. तरुणीशी ओळख वाढल्यानंतर त्याने तिला आर्थिक मदत केली. त्यानंतर तरुणीने त्याच्याकडे दुचाकी खरेदीसाठी पैसे मागितले. तरुणाने तिला २५ हजार रुपये पाठविले. त्यानंतर तरुणीने पुन्हा त्याच्याशी संपर्क साधला. मी गर्भवती असून, पती चेतन हिंगमरेला या प्रकाराची माहिती देणार आहे, असे तरुणीने त्याला सांगितले. घाबरलेल्या तरुणाने आरोपी तरुणी आणि हिंगमिरेला पैसे दिले.
मुलगी अल्पवयीन आहे; तसेच तुझ्यामुळे तिला गर्भधारणा झाली आहे, असे सांगून ती वानवडी पोलिसांकडे बलात्काराची तक्रार करणार असल्याचे म्हेत्रेने तरुणाला सांगितले.
तक्रारदार तरुणाला वाघोली येथे बोलावून आरोपींनी जीवे मारण्याची धमकी दिली. त्याच्याकडून वेळोवेळी ६७ लाख ७ हजार ५५३ रुपये उकळले. त्यानंतरही त्यांनी पैशाची मागणी सुरू ठेवली. घाबरलेल्या तरुणाने गुन्हे शाखेकडे तक्रार केली. गुन्हे शाखेच्या युनिट पाचचे वरिष्ठ पोलिस निरीक्षक हेमंत पाटील आणि पथकाने आरोपी हिंगमिरे आणि निखिल म्हेत्रे यांना अटक केली. आरोपी चेतन सराईत असून, या प्रकरणात गुन्हा दाखल झालेल्या अन्य आरोपींचा शोध सुरू असल्याचे पाटील यांनी सांगितले.
