‘उद्योजकांना त्रास दिल्यास थेट मकोका लावणार’; मुख्यमंत्री देवेंद्र फडणवीस

पिंपरी- चिंचवड : पुणे जिल्हा हे महाराष्ट्राच्या गुंतवणुकीचे कॅपिटल आहे. माहिती तंत्रज्ञान क्षेत्राचे भांडवल म्हणून पुण्याकडे पाहिले जाते. पुणे जिल्ह्यामध्ये अनेक प्रकारची गुंतवणूक येत आहे.या गुंतवणुकीसाठी पोषक वातावरण ठेवणे महत्त्वाचे असून जिल्ह्यातील कोणत्याही उद्योग किंवा उद्योजकाला, कसल्याही प्रकारचा त्रास झाल्यास थेट मकोका अंतर्गत कारवाई करणार असल्याचे मुख्यमंत्री देवेंद्र फडणवीस यांनी स्पष्ट केले. महाराष्ट्रात उद्योगांना कोणत्याह प्रकारचा त्रास होता कामा नये अशा सूचना देखील मुख्यमंत्र्यांनी केल्या.

मुख्यमंत्री देवेंद्र फडणवीस यांच्या हस्ते पोलीस आयुक्त कार्यालय, पिंपरी-चिंचवड नवीन इमारतीचे भूमिपूजन पोलीस अधिक्षक कार्यालय, पुणे ग्रामीण नवीन इमारतीचे भूमिपूजन, पिंपरी-चिंचवड पोलीस आयुक्त कार्यालयाचे पोलीस विश्रामगृहाचे भूमिपूजन,महाळुंगे औद्योगिक पोलीस संकुलाचे भूमिपूजन,’शिवनेरी’ सभागृहाचे उदघाटन पिंपरी-चिंचवड महानगरपालिकेच्या विविध विकास कामांचे व उपक्रमांचे ई-भूमिपूजन आणि लोकार्पण करण्यात आले. यावेळी पालकमंत्री तथा उपमुख्यमंत्री अजित पवार तसेच महसूल मंत्री राधाकृष्ण विखे पाटील, आमदार महेश लांडगे, योगेश कदम, विजय शिवतरे,अण्णा बनसोडे, शंकर जगताप, बापूसाहेब पठारे, शरद सोनवणे, बाबाजी काळे, सुनील शेळके, पिंपरी चिंचवड महापालिकेचे आयुक्त तथा प्रशासक शेखर सिंह, पोलीस आयुक्त विनयकुमार चौबे आदी उपस्थित होते.

हेही वाचा –  ‘पुणे जिल्ह्यांचे विभाजन झाल्यास नव्याने शिवनेरी जिल्हा निर्माण करावा’; आमदार महेश लांडगे

देवेंद्र फडणवीस पुढे म्हणाले, पिंपरी चिंचवड शहराचे विस्तारीकरण गेल्या काही वर्षात मोठ्या प्रमाणात झाले. औद्योगीकरण वाढले अनेक क्लस्टर तयार झाले. या ठिकाणी गुंतवणूक देखील मोठ्या प्रमाणात वाढत आहे.हे सर्व होत असताना स्वतंत्र आयुक्तालयाची गरज निर्माण झाली. वेळोवेळी त्याबाबत मागणी होत गेली. ही मागणी आता पूर्णत्वाला जाणार आहे. 2025 मध्ये पिंपरी चिंचवड शहराचे नवीन आयुक्तालय स्वतंत्र इमारतीमध्ये स्थलांतरित होईल. सुसज्ज, अत्याधुनिक आणि खाजगी गृहनिर्माण धोरणालाही लाजवेल असे अद्यावत सरकारी कार्यालय निर्माण होणार आहे. अत्यंत निकडीची गरज म्हणून आयुक्तालयाची निर्मिती ती देखील सीएसआर फंडाच्या माध्यमातून हे कौतुकास्पद आहे.

देवेंद्र फडणवीस पुढे म्हणाले पुण्याच्या भागांमध्ये मधून मधून उद्योजकांकडून काही तक्रारी येतात. जाणीवपूर्वक त्रास, ब्लॅकमेलिंग आणि वसुलीच्या तक्रारी केल्या जातात.मात्र यापुढे असे काहीही खपवून घेतले जाणार नाही.यामध्ये कोणत्याही पक्षाचा, कोणाचाही पदाधिकारी असू दे थेट मकोका अंतर्गत कारवाई करा. पुणे हे महाराष्ट्राच्या गुंतवणुकीचे कॅपिटल आहे. त्यामुळे येथे उद्योगाला कोणत्याही प्रकारचा त्रास सहन केला जाणार नाही असे देखील फडणवीस म्हणाले.

थेट परकीय गुंतवणूक गुंतवणूक आकर्षित करण्यात महाराष्ट्र अग्रेसर

चिखलीतील पोलीस आयुक्तालयाच्या भूमिपूजनापूर्वी ख्यमंत्री देवेंद्र फडणवीस यांनी मावळ, पुणे येथे लोट्टे इंडियाच्या हॅवमोर आईस्क्रीम उत्पादन प्रकल्पाचे उद्घाटन केले. यावेळी मुख्यमंत्री म्हणाले, थेट परकीय गुंतवणूक आकर्षित करण्यात महाराष्ट्र जगात अग्रेसर असून महाराष्ट्र उद्योग विभाग यामध्ये महत्वाची भूमिका बजावत आहे, भारतातील ३५% थेट परकीय गुंतवणूक महाराष्ट्रात आली आहे, या गुंतवणुकीमळे महाराष्ट्र परकीय गुंतवणुकीचे केंद्र बनत आहे. दावोसमध्ये महाराष्ट्राने १६ लाख कोटी रुपयांची गुंतवणूक खेचून आणली.महाराष्ट्र शाश्वत औद्योगिक प्रगतीसाठी सज्ज आहे असेही मुख्यमंत्री फडणवीस म्हणाले.

महाईन्यूज-X वर फॉलो करा : महाईन्यूजला instagram वर फॉलो करा