एकनाथ शिंदे संपूर्ण शिवसेना पक्षाचे प्रतिनिधित्व करू शकत नाहीत; कपिल सिब्बल यांचा सर्वोच्च न्यायालयात युक्तिवाद
धनुष्यबाण चिन्हाच्या वादावर पुन्हा सुनावणी; भरत गोगावले यांच्या प्रतोदपदाच्या नियुक्तीवरही ठाकरे गटाकडून आक्षेप

नवी दिल्ली : शिवसेना पक्ष आणि धनुष्यबाण निवडणूक चिन्हाच्या वादावर सर्वोच्च न्यायालयात पुन्हा सुनावणी पार पडली. या सुनावणीदरम्यान ठाकरे गटाच्या वतीने ज्येष्ठ विधिज्ञ कपिल सिब्बल यांनी युक्तिवाद करत एकनाथ शिंदे हे संपूर्ण शिवसेना पक्षाचे प्रतिनिधित्व करू शकत नाहीत, असा मुद्दा मांडला. शिंदे हे केवळ विधिमंडळ पक्षाचे प्रतिनिधित्व करतात, असा दावा त्यांनी न्यायालयात केला.
भरत गोगावले यांच्या प्रतोदपदाच्या नियुक्तीवर आक्षेप
सुनावणीदरम्यान कपिल सिब्बल यांनी शिंदे गटाचे आमदार भरत गोगावले यांची प्रतोद अर्थात व्हीप म्हणून करण्यात आलेली नियुक्ती चुकीची असल्याचा युक्तिवाद केला. गोगावले यांची नियुक्ती राजकीय पक्षाने केलेली नव्हती, असे त्यांनी न्यायालयाच्या निदर्शनास आणून दिले.
हेही वाचा – करसवलतीचा लाभ कर्मचाऱ्यांनाही दिला का? पंतप्रधान मोदींचा उद्योगजगताला सवाल
तसेच, गुवाहाटीत बसून एकनाथ शिंदे व्हीप कोण असणार, हे ठरवू शकत नाहीत, असा दावाही सिब्बल यांनी केला. शिवसेना पक्ष आणि विधिमंडळ पक्ष यांच्यातील फरक अधोरेखित करत त्यांनी शिंदे यांच्या नेतृत्वाखालील गटाला संपूर्ण पक्षाचे प्रतिनिधित्व करण्याचा अधिकार असल्याच्या मुद्द्यावर प्रश्न उपस्थित केला.
शिवसेना पक्षावरील अधिकार आणि धनुष्यबाण चिन्हाच्या वादात सर्वोच्च न्यायालयातील या सुनावणीला महत्त्व प्राप्त झाले आहे. ठाकरे गटाकडून मांडण्यात आलेले हे मुद्दे आणि त्यावर न्यायालयाची पुढील भूमिका काय असेल, याकडे राजकीय वर्तुळाचे लक्ष लागले आहे.




