‘माझ्या मुलाच्या नावाचं पाकीट देण्याचा प्रश्नच कुठे?’; हसन मुश्रीफांचा सतेज पाटलांना सवाल
‘गोकुळ’च्या अध्यक्षपदावरून हसन मुश्रीफांचा मोठा खुलासा; अरुण डोंगळे यांच्या राजीनाम्यापासून शशिकांत चूयेकरांच्या नावापर्यंतचा घटनाक्रम सांगितला
कोल्हापूर : कोल्हापूर जिल्हा सहकारी दूध उत्पादक संघ अर्थात ‘गोकुळ’च्या अध्यक्षपदावरून वैद्यकीय शिक्षण मंत्री हसन मुश्रीफ आणि काँग्रेस नेते सतेज पाटील यांच्यातील वाद पुन्हा चर्चेत आला आहे. अरुण डोंगळे यांच्या राजीनाम्यापासून अध्यक्षपदासाठी नाव निश्चित करण्यापर्यंतचा घटनाक्रम सांगत मुश्रीफ यांनी सतेज पाटील यांच्या आरोपांना प्रत्युत्तर दिले आहे. तसेच, ‘माझ्या मुलाच्या नावाचं पाकीट देण्याचा प्रश्नच कुठे?’ असा सवालही त्यांनी उपस्थित केला.
अध्यक्षपदासाठी बाबासाहेब चौगुले यांचे नाव सुचवले होते
हसन मुश्रीफ यांनी सांगितले की, अरुण डोंगळे राजीनामा देण्यास टाळाटाळ करत असताना नवीन अध्यक्ष कोणाला करायचे, याबाबत त्यांची आणि सतेज पाटील यांची चर्चा झाली होती. त्या वेळी सतेज पाटील यांनी बाबासाहेब चौगुले यांचे नाव सुचवले होते. त्यांनी शशिकांत पाटील चूयेकर यांचे नाव सुचवले नव्हते, असा दावा मुश्रीफ यांनी केला.
‘मला बाबासाहेब चौगुले यांना अध्यक्ष करायचे आहे,’ असे सतेज पाटील म्हणाले होते. मात्र, शशिकांत पाटील यांना अध्यक्ष केले तरच अरुण डोंगळे राजीनामा देतील, असे आपण सांगितल्यानंतर चूयेकर यांचे नाव पुढे आले, असे मुश्रीफ यांनी स्पष्ट केले.
त्यानंतर अरुण डोंगळे यांनी एकनाथ शिंदे यांनी सांगितल्याशिवाय आपण राजीनामा देणार नसल्याची भूमिका घेतल्याचा दावाही मुश्रीफ यांनी केला.
‘मुलाच्या नावाचे पाकीट देण्याचा प्रश्नच कुठे?’
सतेज पाटील यांनी मुश्रीफ यांच्यावर जातीयवादाचा आरोप केला होता. त्यानंतर ‘तुमच्या मुलाच्या नावाचे पाकीट देताना मी जातीयवादी नव्हतो का?’ असा सवाल सतेज पाटील यांनी उपस्थित केल्याचे वृत्त होते. यावर आता मुश्रीफ यांनी स्पष्टीकरण दिले आहे.
मुश्रीफ म्हणाले की, अरुण डोंगळे यांच्या राजीनाम्याचा प्रश्न निर्माण झाल्यानंतर तोडगा काढण्यासाठी त्यांच्या मुलाचे नाव मुंबईत ठरवण्यात आले होते. त्यामुळे सतेज पाटील यांनी त्यांच्या मुलाच्या नावाचे पाकीट देण्याचा प्रश्नच उद्भवत नाही, असे त्यांनी म्हटले.
‘आमच्याकडे बहुमत आहे, असे सतेज पाटील सांगत आहेत. मग आमची गरज तुम्हाला का वाटते? आम्ही कुठे आडवे आलो आहोत?’ असा सवालही त्यांनी केला.
‘सभेला उपस्थित न राहण्याचे स्वातंत्र्य आम्हाला आहे की नाही?’
गोकुळच्या सभेला उपस्थित न राहण्याचा अधिकार आपल्याला आहे की नाही, असा प्रश्न उपस्थित करत मुश्रीफ यांनी सतेज पाटील यांच्यावर टीका केली. ‘माझे बोट धरून त्यांनी मला गोकुळला नेले. तीन मंत्री, दोन खासदार आणि दहा आमदार यांना त्यांनी बांधले आहे. इतक्या मोठ्या माणसावर मी काय बोलणार?’ अशी टिप्पणी त्यांनी केली.
निवडणूक निर्णय अधिकाऱ्यांनी सभा तहकूब केल्यानंतर अध्यक्षांची निवड कशी होऊ शकते, असा सवालही मुश्रीफ यांनी उपस्थित केला. अशा प्रकारे पुढे जाण्याऐवजी कायदेशीर मार्गाचा अवलंब करावा, असे त्यांनी म्हटले.
‘पुढील पाच वर्षांत शशिकांत पाटील यांना अध्यक्ष करू’
शशिकांत पाटील यांना भविष्यात अध्यक्ष करण्याबाबत आपण आश्वासन दिले असल्याचे मुश्रीफ यांनी सांगितले. या पाच वर्षांत किंवा पुढील पाच वर्षांत त्यांना अध्यक्ष करू, असे आपण म्हटल्याचे त्यांनी स्पष्ट केले.
आता हा विषय संचालक फोडाफोडीचा राहिलेला नसून कायदेशीर प्रक्रियेचा आहे, असेही मुश्रीफ म्हणाले. त्यांच्या म्हणण्यानुसार, अध्यक्ष निवडीसाठी 14 जणांची उपस्थिती म्हणजेच आवश्यक कोरम पूर्ण होणे गरजेचे आहे. कोरम पूर्ण झाल्याशिवाय अध्यक्ष निवड होऊ शकत नाही.
‘सतेज पाटील आणि माझ्या मैत्रीची जी अग्निपरीक्षा द्यावी लागणार होती, ती आम्ही दिली आहे,’ असे सांगत मुश्रीफ यांनी या वादावर आपली भूमिका मांडली.
महाईन्यूज-X वर फॉलो करा : महाईन्यूजला instagram वर फॉलो करा
