इंडिया आघाडीच्या मोर्चादरम्यान ठाकरे गटाला धक्का; प्रवक्ते आनंद दुबे यांचा राजीनामा

मुंबई : इंडिया आघाडीच्या मोर्चादरम्यान शिवसेना (उद्धव बाळासाहेब ठाकरे) गटाला धक्का बसला आहे. पक्षाचे प्रवक्ते आणि ठाकरे गटाचा हिंदी चेहरा म्हणून ओळखले जाणारे आनंद दुबे यांनी पक्षाचा राजीनामा दिला आहे. पक्षाच्या कार्यपद्धतीवर नाराजी असल्याने आपण हा निर्णय घेतल्याचे दुबे यांनी सांगितले. महाविकास आघाडीत एकजुटीच्या चर्चा सुरू असतानाच त्यांच्या राजीनाम्यामुळे राजकीय वर्तुळात चर्चांना उधाण आले आहे.

‘राष्ट्रहित सर्वोपरी असले पाहिजे’

राजीनाम्यानंतर आनंद दुबे यांनी राष्ट्रीय मुद्द्यांवर मतभेद असू शकतात; मात्र राष्ट्रहित हेच सर्वोपरी असले पाहिजे, अशी भूमिका मांडली. २२ एप्रिल रोजी पहलगाम येथे झालेल्या दहशतवादी हल्ल्याचा संदर्भ देत त्यांनी या घटनेनंतरच्या आपल्या भूमिकेबाबत भाष्य केले.

दुबे यांच्या म्हणण्यानुसार, २६ एप्रिल रोजी त्यांनी पक्षाचे सहकारी आणि विधिमंडळ शाखेचे उप-संघटक गुलाबचंद मौर्य यांच्यासोबत पहलगाम येथील घटनास्थळाला भेट दिली होती. त्या वेळी गोळीबारामुळे परिसरात तणावपूर्ण परिस्थिती असल्याचे त्यांनी नमूद केले. या भेटीदरम्यान फारुख अब्दुल्ला आणि जम्मू-काश्मीरचे नायब राज्यपाल मनोज सिन्हा यांची भेट घेऊन पक्षाचा पाठिंबा असल्याचे आश्वासन दिल्याचेही त्यांनी सांगितले.

हेही वाचा –  ‘संविधान हातात घेऊन संवैधानिक संस्थांना बदनाम करण्याचा प्रयत्न’; आंदोलनावर फडणवीस यांची टीका

‘पक्ष आणि स्वतःचा विचार नंतर, देश आधी’

अशा संकटाच्या काळात ज्येष्ठ खासदार आणि आमदारांनी घटनास्थळी भेट देणे आवश्यक होते, असे मत दुबे यांनी व्यक्त केले. आपण मोठे नेते किंवा नगरसेवक नसलो, तरी बाळासाहेब ठाकरे यांच्या विचारांनी प्रेरित असून आपल्यात शिवसैनिकाची भावना आहे, असेही ते म्हणाले.

देशासमोरील संकटाच्या वेळी पक्षीय भूमिका आणि वैयक्तिक विचारांपेक्षा देशहिताला प्राधान्य दिले पाहिजे, असे दुबे यांनी स्पष्ट केले. त्यांच्या राजीनाम्यामागे पक्षाच्या कार्यपद्धतीबाबतची नाराजी आणि राष्ट्रीय मुद्द्यांवरील भूमिका ही कारणे असल्याचे त्यांच्या वक्तव्यावरून दिसून येते.

महाईन्यूज-X वर फॉलो करा : महाईन्यूजला instagram वर फॉलो करा