गर्जना मोर्चात कोण-कोण सहभागी होणार? काँग्रेसच्या बड्या नेत्यांची अनुपस्थिती चर्चेत

मुंबई : केंद्रीय निवडणूक आयोग आणि मुख्य निवडणूक आयुक्त ज्ञानेश कुमार यांच्या विरोधात मनसे अध्यक्ष राज ठाकरे आणि शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांच्या नेतृत्वाखाली आज, ४ ऑक्टोबर रोजी मुंबईत ‘गर्जना मोर्चा’ काढण्यात येणार आहे. सुरुवातीला निश्चित केलेल्या मार्गात बदल करण्यात आला असून, आता हा मोर्चा मेट्रो सिनेमा येथून मुंबई महापालिका मुख्यालयापर्यंत काढण्यात येणार आहे. त्यानंतर महापालिका मुख्यालयाजवळ मोर्चाचे सभेत रूपांतर होणार आहे.

ठाकरे बंधूंनी या मोर्चासाठी विविध राजकीय पक्ष आणि नागरिकांना सहभागी होण्याचे आवाहन केले आहे. मोर्चात कोणत्याही राजकीय पक्षाचा झेंडा न वापरता केवळ तिरंगा ठेवण्याचे आवाहन करण्यात आले आहे.

राष्ट्रवादीच्या नेत्यांचा सहभाग

मोर्चाला विरोधी पक्षांतील काही घटकांचा प्रतिसाद मिळत असून, राष्ट्रवादी काँग्रेस पक्षाच्या शरदचंद्र पवार गटातील नेते सहभागी होणार असल्याची माहिती आहे. शशिकांत शिंदे, जितेंद्र आव्हाड आणि अनिल देशमुख यांची नावे चर्चेत आहेत. याशिवाय शेकाप तसेच डाव्या पक्षांतील नेते आणि कार्यकर्तेही सहभागी होण्याची शक्यता आहे.

काँग्रेसच्या प्रमुख नेत्यांच्या उपस्थितीबाबत प्रश्न

काँग्रेसचे पदाधिकारी आणि कार्यकर्ते मोर्चात सहभागी होण्याची शक्यता असली, तरी पक्षाच्या प्रमुख नेत्यांच्या उपस्थितीबाबत अद्याप स्पष्टता नाही. महाराष्ट्र काँग्रेसचे प्रदेशाध्यक्ष हर्षवर्धन सपकाळ नियोजित बैठकींमुळे उपस्थित राहणार नसल्याचे सांगितले जात आहे. मुंबई काँग्रेसच्या अध्यक्षा वर्षा गायकवाड यांच्या उपस्थितीबाबतही अनिश्चितता आहे.

दरम्यान, निवडणूक आयोगाच्या कारभाराबाबत काँग्रेसकडून स्वतंत्रपणेही आंदोलन आणि टीका करण्यात आली आहे. २९ सप्टेंबर रोजी मुंबईत काँग्रेस कार्यकर्त्यांनी मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी आंदोलन केले होते.

हेही वाचा –  दुष्काळग्रस्त शेतकऱ्यांसाठी शासनाची मदत; रोजगार, चारा-पाणी आणि जलसंधारणाला प्राधान्य

राहुल गांधींच्या भूमिकेनंतर विरोधकांच्या एकजुटीची चर्चा

लोकसभेतील विरोधी पक्षनेते राहुल गांधी यांनी निवडणूक आयोगाच्या कार्यपद्धतीवर सातत्याने प्रश्न उपस्थित केले आहेत. विविध विरोधी पक्षांनी वेगवेगळ्या व्यासपीठांवरून आंदोलन करण्याऐवजी निवडणूक प्रक्रियेबाबतच्या मुद्द्यांवर एकत्र येण्याची गरज असल्याचे त्यांनी म्हटले आहे.

या पार्श्वभूमीवर राज ठाकरे आणि उद्धव ठाकरे यांच्या संयुक्त मोर्चाकडे राजकीय वर्तुळाचे लक्ष लागले आहे. मात्र, या मोर्चातील विविध पक्षांच्या नेत्यांची प्रत्यक्ष उपस्थिती आणि त्यांची भूमिका मोर्चादरम्यान स्पष्ट होणार आहे.

मोर्चाच्या पार्श्वभूमीवर मुंबई पोलिसांनी सुरक्षेची तयारी वाढवली असून, मेट्रो सिनेमा परिसरात बॅरिकेडिंग करण्यात आले आहे.

महाईन्यूज-X वर फॉलो करा : महाईन्यूजला instagram वर फॉलो करा