‘भाजपचे तिन्ही उमेदवार विजयी होतील’; विधान परिषद निवडणुकीवर फडणवीसांचा विश्वास, ठाकरे बंधूंवरही निशाणा
भाजपने तीन सक्षम उमेदवार दिले; मित्रपक्षांच्या दोन जागाही जिंकण्याचा फडणवीसांचा दावा
मुंबई : महाराष्ट्र विधान परिषदेच्या शिक्षक आणि पदवीधर मतदारसंघांच्या निवडणुकीसाठी भाजपने तीन उमेदवार जाहीर केल्यानंतर मुख्यमंत्री देवेंद्र फडणवीस यांनी या उमेदवारांच्या विजयाचा विश्वास व्यक्त केला आहे. पुणे पदवीधर मतदारसंघातून डॉ. स्मिता योगेश जाधव, पुणे शिक्षक मतदारसंघातून कौस्तुभ गावडे आणि नागपूर पदवीधर मतदारसंघातून सुधाकर कोहळे यांना भाजपने उमेदवारी दिली आहे. भाजपच्या तिन्ही जागा विजयी होतील, तर उर्वरित दोन जागांवर मित्रपक्ष विजयी होतील, असे फडणवीस यांनी म्हटले आहे.
पक्षाकडून ज्याला अधिकृत उमेदवारी मिळाली आहे, त्याने निवडणूक लढवावी आणि ज्यांना उमेदवारी मिळालेली नाही त्यांनी माघार घ्यावी, असे आवाहन फडणवीस यांनी केले. इच्छुकांशी पक्षाच्या पातळीवर चर्चा केली जाईल, असेही त्यांनी स्पष्ट केले.
पुणे पदवीधर मतदारसंघातील डॉ. स्मिता जाधव यांच्या उमेदवारीचे फडणवीस यांनी कौतुक केले. पदवीधर मतदारसंघासाठी त्या सक्षम उमेदवार असून त्यांना मतदारांचा पाठिंबा मिळेल, असा विश्वास त्यांनी व्यक्त केला.
पुणे शिक्षक मतदारसंघातील कौस्तुभ गावडे हे शिक्षण क्षेत्रात विविध संस्थांच्या माध्यमातून काम करत असल्याचे फडणवीस यांनी सांगितले. शिक्षक, प्राध्यापक आणि शिक्षण क्षेत्राशी संबंधित प्रश्नांचा त्यांना अनुभव असल्याचे त्यांनी नमूद केले. नागपूर पदवीधर मतदारसंघातील सुधाकर कोहळे हे यापूर्वी आमदार आणि भाजपचे जिल्हाध्यक्ष राहिले असून त्यांनी पक्षासाठी काम केले आहे, असेही फडणवीस म्हणाले.
हेही वाचा – विधान परिषद निवडणुकीला रंगत; उमेदवार जाहीर होताच मतदारसंघांतील राजकीय हालचालींना वेग
ठाकरे बंधूंच्या मोर्चावर फडणवीसांची टीका
दरम्यान, उद्धव ठाकरे आणि राज ठाकरे यांच्या नेतृत्वाखाली मुंबईत काढण्यात आलेल्या संयुक्त मोर्चावरही फडणवीस यांनी प्रतिक्रिया दिली. मुख्य निवडणूक आयुक्त ज्ञानेश कुमार यांच्या राजीनाम्याची मागणी तसेच महाराष्ट्रातील मतदारयादीच्या विशेष सखोल पुनरावलोकनाला (SIR) विरोध करण्यासाठी हा मोर्चा काढण्यात आला होता.
या मोर्चावर टीका करताना फडणवीस यांनी हा मोर्चा ‘हरवलेली जमीन शोधण्याचा प्रयत्न’ असल्याचे म्हटले. मोर्चासाठी मोठ्या प्रमाणावर वातावरणनिर्मिती करण्यात आली असली तरी अपेक्षेप्रमाणे गर्दी झाली नसल्याचा दावा त्यांनी केला.
‘२०२४च्या निवडणुकांवर २०२६चा SIR कसा परिणाम करणार?’
निवडणूक आयोगाच्या मुद्द्यावरून ठाकरे बंधूंकडून होत असलेल्या टीकेलाही फडणवीस यांनी उत्तर दिले. महाराष्ट्र विधानसभा निवडणुका २०२४ मध्ये झाल्या, ज्ञानेश कुमार हे २०२५ मध्ये मुख्य निवडणूक आयुक्त झाले, तर महाराष्ट्रात SIRची प्रक्रिया २०२६ मध्ये होत असल्याचे त्यांनी सांगितले.
त्यामुळे २०२५ मध्ये मुख्य निवडणूक आयुक्त झालेल्या ज्ञानेश कुमार यांचा २०२४च्या महाराष्ट्र विधानसभा निवडणुकीवर कसा परिणाम होऊ शकतो, असा सवाल फडणवीस यांनी उपस्थित केला. ठाकरे बंधूंचे आरोप तथ्यहीन असल्याची टीका त्यांनी केली.
दरम्यान, ठाकरे बंधूंनी निवडणूक आयोगाच्या कार्यपद्धतीवर प्रश्न उपस्थित करत मुख्य निवडणूक आयुक्तांच्या राजीनाम्याची मागणी केली आहे. त्यामुळे विधान परिषद निवडणुकीच्या पार्श्वभूमीवर उमेदवारीबरोबरच निवडणूक प्रक्रियेवरील राजकीय आरोप-प्रत्यारोपांनाही वेग आला आहे.
महाईन्यूज-X वर फॉलो करा : महाईन्यूजला instagram वर फॉलो करा
