रोहित-विराट वनडे संघात कायम; वेस्ट इंडिजविरुद्धच्या मालिकेसाठी भारतीय संघ जाहीर

मुंबई : भारतीय क्रिकेट नियामक मंडळाने (BCCI) वेस्ट इंडिजविरुद्ध भारतात होणाऱ्या आगामी वनडे आणि टी-20 मालिकेसाठी भारतीय संघाची घोषणा केली आहे. 27 सप्टेंबरपासून सुरू होणाऱ्या तीन सामन्यांच्या वनडे मालिकेचे नेतृत्व शुबमन गिलकडे सोपवण्यात आले असून, टी-20 संघाची धुरा श्रेयस अय्यरकडे देण्यात आली आहे.

वनडे संघ निवडीतील सर्वाधिक चर्चेचा विषय ठरलेल्या रोहित शर्मा आणि विराट कोहली या दोन्ही अनुभवी फलंदाजांना संघात कायम ठेवण्यात आले आहे. त्यामुळे आगामी वनडे विश्वचषकाच्या तयारीत दोन्ही खेळाडूंच्या भूमिकेबाबत निवड समितीने सातत्य ठेवले असल्याचे दिसून येते.

जुलै 2026 मध्ये इंग्लंडविरुद्ध झालेल्या वनडे मालिकेत रोहितच्या निवडीबाबत मोठी चर्चा झाली होती. मात्र, मालिकेतील निर्णायक तिसऱ्या सामन्यात त्याने 110 चेंडूंत 138 धावांची खेळी केली. या कामगिरीनंतर त्याच्या वनडे कारकिर्दीबाबतच्या चर्चेला वेगळे वळण मिळाले.

दरम्यान, श्रेयस अय्यर आणि जसप्रीत बुमराह यांचा वनडे संघात समावेश करण्यात आलेला नाही. 2026 आशियाई क्रीडा स्पर्धांमुळे दोन्ही खेळाडू या मालिकेसाठी उपलब्ध नसल्याचे सांगितले जात आहे. श्रेयसच्या अनुपस्थितीत ऋतुराज गायकवाडचे वनडे संघात पुनरागमन झाले आहे.

हेही वाचा –  वृक्षछाटणीतून निघणारे लाकूड अंत्यविधीसाठी मोफत देण्याचा पर्यावरणपूरक निर्णय..!

यष्टीरक्षक ऋषभ पंतची वनडे संघात निवड झालेली नाही. त्याच्या जागी ध्रुव जुरेलचा राखीव यष्टीरक्षक म्हणून समावेश करण्यात आला आहे. पंतला इराणी चषकासाठी ‘रेस्ट ऑफ इंडिया’ संघाचे कर्णधारपद देण्यात आले आहे. हार्दिक पांड्याचाही वनडे किंवा टी-20 संघात समावेश नसल्याने त्याच्या उपलब्धतेबाबत चर्चा सुरू झाली आहे.

वनडे संघ

शुबमन गिल (कर्णधार), रोहित शर्मा, विराट कोहली, ऋतुराज गायकवाड, केएल राहुल (उपकर्णधार), ध्रुव जुरेल, नितीश कुमार रेड्डी, रवींद्र जडेजा, कुलदीप यादव, प्रसिध कृष्णा, गुरनूर ब्रार, मोहम्मद सिराज, औकिब नबी, यशस्वी जयस्वाल आणि नमन धीर.

टी-20 संघ

श्रेयस अय्यर (कर्णधार), अभिषेक शर्मा, वैभव सूर्यवंशी, इशान किशन (यष्टीरक्षक), संजू सॅमसन (यष्टीरक्षक), तिलक वर्मा (उपकर्णधार), शिवम दुबे, कुलदीप यादव, अक्षर पटेल, वॉशिंग्टन सुंदर, रवी बिश्नोई, नितीश कुमार रेड्डी, अर्शदीप सिंग, प्रिन्स यादव आणि मयांक यादव.

भारत-वेस्ट इंडिज मालिकेचे वेळापत्रक

सामना                       तारीख                     ठिकाण                     वेळ

पहिला वनडे       27 सप्टेंबर 2026            तिरुवनंतपुरम     दुपारी 2 वाजता

दुसरा वनडे         30 सप्टेंबर 2026            गुवाहाटी            दुपारी 2 वाजता

तिसरा वनडे       3 ऑक्टोबर 2026           न्यू चंदीगड         दुपारी 2 वाजता

पहिला टी-20     6 ऑक्टोबर 2026           लखनऊ  सायंकाळी 7 वाजता

दुसरा टी-20       9 ऑक्टोबर 2026           रांची     सायंकाळी 7 वाजता

तिसरा टी-20      11 ऑक्टोबर 2026         इंदूर      सायंकाळी 7 वाजता

चौथा टी-20       14 ऑक्टोबर 2026         हैदराबाद            सायंकाळी 7 वाजता

पाचवा टी-20     17 ऑक्टोबर 2026         बेंगळुरू  सायंकाळी 7 वाजता

महाईन्यूज-X वर फॉलो करा : महाईन्यूजला instagram वर फॉलो करा