प्रोटीन पावडरमध्ये अळ्या आढळल्याचा बिपाशा बासूचा दावा; तुकाराम मुंढेंना टॅग करत कारवाईची मागणी

मुंबई : बॉलिवूड अभिनेत्री बिपाशा बासूने एका न्यूट्रिशन प्रॉडक्टबाबत गंभीर दावा करत महाराष्ट्र अन्न व औषध प्रशासनाचे (FDA) आयुक्त तुकाराम मुंढे यांच्याकडे मदतीची मागणी केली आहे. प्रोटीन पावडरच्या कंटेनरमध्ये मोठ्या संख्येने अळ्या आढळल्याचा दावा बिपाशाने केला असून, यासंदर्भातील व्हिडीओ तिने इन्स्टाग्राम स्टोरीवर शेअर केला आहे.

बिपाशाने शेअर केलेल्या व्हिडीओमध्ये ती एका ग्लासमध्ये प्रोटीन पावडर ओतताना दिसत असून, त्यामध्ये लहान अळ्या असल्याचे ती दाखवत आहे. तिने त्यातील एका कीटकाचा क्लोज-अपही व्हिडीओमध्ये दाखवला आहे. कंटेनर नुकताच उघडल्यानंतर त्यात मोठ्या संख्येने अळ्या आढळल्याचे तिने म्हटले आहे.

या पोस्टमध्ये बिपाशाने तुकाराम मुंढे यांना थेट टॅग करत भेसळयुक्त किंवा निकृष्ट दर्जाच्या खाद्यपदार्थांविरोधात कारवाई करण्याची विनंती केली आहे.

‘तुम्हीच आमची शेवटची आशा’

बिपाशाने आपल्या पोस्टमध्ये तुकाराम मुंढे यांना उद्देशून, “आम्हाला भेसळयुक्त अन्नपदार्थ किंवा निकृष्ट दर्जाची उत्पादने मिळू नयेत, यासाठी आता तुम्हीच आमची शेवटची आशा आहात,” अशा आशयाचे आवाहन केले आहे.

अभिनेत्रीच्या या पोस्टनंतर सोशल मीडियावर मोठी चर्चा सुरू झाली आहे. मात्र, बिपाशाने केलेल्या दाव्याची स्वतंत्रपणे पडताळणी झालेली नाही. तसेच तिच्या तक्रारीच्या अनुषंगाने संबंधित न्यूट्रिशन ब्रँडविरोधात महाराष्ट्र FDAने कोणती कारवाई केली आहे किंवा तपास सुरू केला आहे का, याबाबत अद्याप अधिकृत माहिती समोर आलेली नाही.

हेही वाचा – महाराष्ट्राच्या हरित अर्थव्यवस्थेला मोठी चालना; स्वच्छ ऊर्जा, हरित उद्योगांत अब्जावधींच्या गुंतवणुकीची घोषणा

यापूर्वी श्वेता तिवारीनेही केली होती तक्रार

यापूर्वी अभिनेत्री श्वेता तिवारीने ऑनलाइन मागवलेल्या ड्रिंकमध्ये झुरळ आढळल्याचा दावा केला होता. त्यावेळी तिनेही अशा प्रकारच्या निष्काळजीपणाविरोधात महाराष्ट्र FDAकडे कारवाईची मागणी केली होती.

तुकाराम मुंढेंच्या कारवाईची चर्चा

महाराष्ट्र अन्न व औषध प्रशासनाचे आयुक्त तुकाराम मुंढे यांच्या नेतृत्वाखाली अन्न भेसळ आणि अन्नसुरक्षेच्या नियमांचे उल्लंघन करणाऱ्यांविरोधात करण्यात येणाऱ्या कारवायांची सध्या चर्चा आहे. रेस्टॉरंट्स आणि खाद्य आस्थापनांची तपासणी करून स्वच्छता व अन्नसुरक्षा मानकांचे उल्लंघन आढळल्यास कारवाई केली जात आहे.

याच पार्श्वभूमीवर बिपाशा बासूनेही आपल्या तक्रारीसाठी तुकाराम मुंढे यांना टॅग केल्याने या प्रकरणाची चर्चा अधिक वाढली आहे.

महाईन्यूज-X वर फॉलो करा : महाईन्यूजला instagram वर फॉलो करा