“दोन कोटी मतदार कायमचे बाद झाले असं समजू नका”; मुख्य निवडणूक अधिकाऱ्यांचे मोठे वक्तव्य
मुंबई | महाराष्ट्रामध्ये जनगणनेची आकडेवारी जाहीर करण्यात आली आहे. त्याचबरोबर राज्यात १ जुलैपासून सुरू झालेल्या ‘एसआयआर २०२६’ (SIR 2026) मोहिमेत आतापर्यंत सुमारे २ कोटी ७ लाख मतदारांची नावे वगळण्यात आल्याची जोरदार चर्चा सुरू होती. या संपूर्ण पार्श्वभूमीवर आता राज्याचे मुख्य निवडणूक अधिकारी एस. चोकलिंगम यांनी अत्यंत महत्त्वाची माहिती देत वस्तुस्थिती स्पष्ट केली आहे.
मी प्रत्येक मतदाराला आवाहन करतो की..
एस. चोकलिंगम यांनी सांगितले की, “माझे प्रत्येक मतदाराला नम्र आवाहन आहे की त्यांनी मसुदा मतदार यादी तपासावी. केवळ राज्यभरातील एकूण आकड्यांकडे पाहू नका. तुमचे स्वतःचे नाव यादीत आहे का आणि तुमचे सर्व तपशील बरोबर आहेत का, हे तपासा. नाव नसल्यास समावेशासाठी तातडीने अर्ज करा. काही चूक आढळल्यास दुरुस्तीची मागणी करा. नाव वगळण्याशी संबंधित काही मुद्दा असल्यास फॉर्म ६ भरून नाव समाविष्ट करण्यासाठी पुन्हा अर्ज करता येईल. प्रसिद्ध करण्यात आलेली मसुदा यादी ही अंतिम यादी नाही; अंतिम मतदार यादी प्रसिद्ध होण्यापूर्वी दावे आणि हरकतींची संपूर्ण प्रक्रिया पार पाडली जाते.”
दोन कोटी मतदारांबाबत काय म्हणाले निवडणूक अधिकारी?
२ कोटी गोळा न होऊ शकलेल्या ईएफ (EFs) बाबतच्या अंतिम वर्गीकरणावर विचारले असता चोकलिंगम म्हणाले की, “यामध्ये ७५.५२ लाख मतदार अनुपस्थित किंवा भेटले नाहीत, ७६.८० लाख मतदार कायमस्वरूपी स्थलांतरित झाले आहेत, ३४.८१ लाख मतदार मृत आहेत, १७.६३ लाख मतदार आधीच अन्यत्र नोंदणीकृत किंवा दुबार आहेत, तर २.२३ लाख इतर श्रेणीतील आहेत. विविध जिल्हाधिकाऱ्यांच्या अधिकृत संकेतस्थळांवर मसुदा मतदार याद्या प्रकाशित केल्या जात आहेत, जेणेकरून नागरिकांना आपली नावे तपासता येतील. संबंधित निवडणूक अधिकाऱ्यांमार्फत राजकीय पक्षांच्या बूथ स्तरावरील प्रतिनिधींनाही (BLA) या याद्या उपलब्ध करून दिल्या जात आहेत. मात्र, हे या प्रक्रियेचे विविध टप्पे आहेत. या टप्प्यावर आम्ही १०० टक्के अचूकतेचा दावा करत नाही.”
हेही वाचा
“प्रत्येकाला लॅपटॉप वाटता येईल एवढा जगात काळा पैसा”; सरन्यायाधीश सूर्य कांत यांचे विधान चर्चेत
बीएलओ (BLO) बाबत काय भाष्य केले?
बीएलओंच्या कार्यपद्धतीबाबत स्पष्ट करताना ते म्हणाले, “बीएलओने मतदाराला किमान एकदा भेट देणे अपेक्षित होते आणि तो व्यक्ती उपलब्ध न झाल्यास तीन वेळा भेट देणे आवश्यक होते. त्यानंतर प्रत्यक्षात काय निष्पन्न झाले यावर अवलंबून प्रकरणांचे वर्गीकरण करण्यात आले. एखादी व्यक्ती अनुपस्थित किंवा संपर्काशिवाय राहिली, तर त्या व्यक्तीचे नेमके काय झाले आहे हे आपल्याला माहीत नसते; ती स्थलांतरित झालेली असू शकते किंवा अन्य कारणाने अनुपस्थित असू शकते. कायमस्वरूपी स्थलांतरितांच्या बाबतीत, ती व्यक्ती त्या पत्त्यावरून प्रत्यक्षात दुसरीकडे गेल्याची माहिती आमच्याकडे उपलब्ध असते. मृत व्यक्तींच्या बाबतीत मृत्यू प्रमाणपत्रे किंवा कुटुंबीयांकडून मिळालेले अहवाल यांसारख्या अधिकृत नोंदींवर आम्ही अवलंबून असतो. तर आधीच अन्यत्र नोंदणीकृत/दुबार प्रकरणांमध्ये त्या व्यक्तीचे नाव मतदार यादीत दुसऱ्या विधानसभा मतदारसंघात आधीच नोंदवलेले असते. सध्या तात्पुरत्या याद्या प्रकाशित केल्या जात असून बीएलओंना या माहितीची काटेकोर पडताळणी करण्याचे आणि आवश्यकतेनुसार पात्र मतदारांकडून फॉर्म ६ किंवा ८ भरून घेण्याचे निर्देश देण्यात आले होते.”
खरे मतदार चुकीने गोळा न होऊ शकलेल्या श्रेणीत वर्गीकृत झाले असतील का?
या प्रश्नावर उत्तर देताना चोकलिंगम म्हणाले की, “यात काही अडचणी नक्कीच असू शकतात. उदाहरणार्थ, शहरी भागांमध्ये अनेक नोकरदार लोक संध्याकाळी ७ किंवा ८ वाजल्यानंतरच घरी परततात. सामान्य कामकाजाच्या वेळेत उपलब्ध नसलेल्या नागरिकांची संख्या मोठी आहे. आमचे बीएलओ रात्री ९ वाजेपर्यंत काम करू शकत नाहीत; शिवाय आमच्या अनेक बीएलओ महिला कर्मचारी आहेत, त्यामुळे आमच्या कामकाजाला काही मर्यादा येतात. म्हणूनच मी हे स्पष्ट करतो की ही प्रक्रियेचे विविध टप्पे आहेत आणि या टप्प्यावर आम्ही संपूर्ण अचूकतेचा दावा करत नाही. ३१ ऑगस्ट रोजी प्रसिद्ध होणारी यादी हा केवळ मसुदा आहे. एखाद्या मतदाराला काही चूक आढळल्यास ती सहज दुरुस्त केली जाऊ शकते. ही केवळ मोजक्या लोकांची जबाबदारी नसून, मतदारसंघातील प्रत्येक सुजाण मतदाराने या मसुद्याची पडताळणी व तपासणी करावी,” असे आवाहन त्यांनी केले.
महाईन्यूज-X वर फॉलो करा : महाईन्यूजला instagram वर फॉलो करा
