रशीद खान चमकला! आयर्लंडवर मात करत अफगाणिस्तान थेट वनडे वर्ल्डकपसाठी पात्र
Afghanistan World Cup | कर्णधार रशीद खानच्या उत्कृष्ट अष्टपैलू कामगिरीच्या जोरावर अफगाणिस्तानने तिसऱ्या एकदिवसीय (ODI) सामन्यात आयर्लंडचा पराभव करत आगामी वनडे वर्ल्डकपसाठी आपले थेट स्थान निश्चित केले आहे. वेस्ट इंडिजसारख्या बलाढ्य संघाला वर्ल्डकपसाठी पात्रता फेरी खेळावी लागणार असताना, अफगाणिस्तानने मात्र सातत्यपूर्ण कामगिरीच्या जोरावर सलग दुसऱ्यांदा थेट पात्र ठरण्याचा मान मिळवला आहे.
बेलफास्ट येथे खेळवण्यात आलेल्या तिसऱ्या एकदिवसीय सामन्यात नाणेफेक जिंकून प्रथम फलंदाजी करणाऱ्या आयर्लंडचा संघ २०६ धावांत गारद झाला. आयर्लंडकडून गॅव्हिन होयने सर्वाधिक ३६ धावांची खेळी केली. अफगाणिस्तानच्या गोलंदाजांनी ३४ अतिरिक्त धावा दिल्या तरीही, रशीद खान आणि अल्लाह मोहम्मद गझनफर यांनी प्रत्येकी ३ बळी घेत आयर्लंडला मोठ्या धावसंख्येपासून रोखले.
हेही वाचा
महाराष्ट्राकडून देशाला हरित वाहतुकीचे दिशादर्शन; मंत्री प्रताप सरनाईक
रहमनुल्ला गुरबाझचा पाया, रशीद खानचा विजयी फिनिश
२०७ धावांच्या आव्हानाचा पाठलाग करताना सलामीवीर रहमनुल्ला गुरबाझने ७१ धावांची दमदार खेळी करत अफगाणिस्तानच्या विजयाचा पाया रचला. मात्र, दुसऱ्या बाजूने ठराविक अंतराने फलंदाज बाद झाल्याने सामना रंगतदार स्थितीत पोहोचला होता. अशा कठीण प्रसंगी कर्णधार रशीद खानने संयमी आणि आक्रमक फलंदाजी करत नाबाद ३७ धावा ठोकल्या आणि संघाला विजय मिळवून दिला. सामन्यातील या अष्टपैलू कामगिरीसाठी रशीद खानला ‘सामनावीर’ (Player of the Match) पुरस्काराने सन्मानित करण्यात आले.
आगामी वनडे वर्ल्डकप आणि पात्र ठरलेले संघ
पुढील वर्षी ऑक्टोबर-नोव्हेंबरमध्ये दक्षिण आफ्रिका आणि झिम्बाब्वे येथे वनडे वर्ल्डकप स्पर्धा पार पडणार आहे. यजमान दक्षिण आफ्रिका व झिम्बाब्वे यांच्यासह भारत, ऑस्ट्रेलिया, इंग्लंड, न्यूझीलंड, पाकिस्तान, श्रीलंका, बांगलादेश आणि अफगाणिस्तान हे १० संघ या स्पर्धेसाठी थेट पात्र ठरले आहेत. उर्वरित चार अंतिम जागांसाठी पात्रता फेरी (Qualifiers) खेळवली जाणार असून, वेस्ट इंडिजसारख्या बलाढ्य संघालाही या पात्रता फेरीत खेळावे लागणार आहे.
महाईन्यूज-X वर फॉलो करा : महाईन्यूजला instagram वर फॉलो करा
