नागपूर | महाईन्यूज
लांब पल्ल्याचे सागरी जलतरणपटू सुखदेव धुर्वे यांनी पत्नी आणि दोन मुलांसह मुंबईतील ‘एलिफंटा केव्ह ते गेट वे ऑफ इंडिया’ हे १६ कि. मी. सागरी अंतर अवघ्या ४.५० तासांत पोहून पूर्ण केले. गतषर्वी २८ एप्रिल रोजी त्यांनी केलेल्या या विक्रमाची नोंद ‘आशिया बुक’मध्ये झाली. आशिया खंडातील ४८ देशांमध्ये एखाद्या कुटुंबाने प्रथमच अशी कामगिरी केलेली आहे.
नागपूर पोलीस खात्यात कॉन्स्टेबल असलेले सुखदेव यांनी पत्नी वैशाली, मुलगा सार्थक आणि मुलगी तन्वी यांच्यासोबतीने हा विक्रम केला. आशिया बुकचे प्रमाणपत्र प्राप्त होताच नागपूरचे पोलीस आयुक्त डॉ. भूषणकुमार उपाध्याय यांनी धुर्वे कुटुंबीयांना पोलीस आयुक्तालयात आमंत्रित केले. त्यांना ५० हजारांचा रोख प्रोत्साहनपर पुरस्कार दिला. उपाध्याय यांनी धुर्वे कुटुंबाच्या कर्तृत्वाचा गौरव करीत सुखदेव यांना भविष्यातील मोहिमेसाठी शुभेच्छा दिल्या आहेत. अनेक स्पर्धा गाजविणारे सुखदेव यांनी २५ कि.मी. जिब्राल्टर खाडी, धरमतर ते गेट वे ऑफ इंडिया हे ३५ कि.मी. सागरी अंतर,रेवास ते गेट वे ऑफ इंडिया हे २५ कि.मी. अंतर आणि मोरा ते गेट वे ऑफ इंडिया हे १९ कि.मी. अंतर विक्रमी वेळेत पोहून पूर्ण केले आहे.या कामगिरीबद्दल त्यांचा सारर्थी पुरस्कार, विदर्भ गौरव, राजा शिवछत्रपती पुरस्कार, बॅरिस्टर शेषराव वानखेडे पुरस्कार आणि वीर बिरसा मुंडा पुरस्काराने गौरव झालेला आहे.
