हिंदी महासागरात दिसल्या चिनी नौदलाच्या नौका
हिंदी महासागरात चिनी नौदलाच्या हालचाली दिसून आल्या आहेत. गस्तीवर असणाऱ्या भारतीय नौदलाच्या विमानांना हिंदी महासागराच्या पश्चिमेकडच्या भागामध्ये चिनी नौदलाच्या जहाजांचा ताफा आढळला. अलीकडे हिंदी महासागरात चिनी नौदलाच्या हालचाली वाढल्या आहेत. चीनच्या मासेमारी करणाऱ्या जहाजांच्या या ताफ्याला पीपल्स लिबरेशन आर्मीच्या नौदलाच्या ताफ्याने संरक्षण दिले होते. टाइम्स नाऊ वाहिनीने नौदलातील सूत्रांच्या हवाल्याने हे वृत्त दिलेले आहे.
मोरोक्कोच्या दिशेने ही जहाजे चालली होती. भारतीय नौदलाचे प्रमुख अॅडमिरल करमबीर सिंग यांनी अलीकडेच हिंदी महासागरात चिनी नौदलाचा वावर वाढल्याची कबुली दिली होती. हिंदी महासागरातील घडामोडींवर भारतीय नौदलाचे बारीक लक्ष असल्याचे नौदल प्रमुखांनी सांगितले होते. मागच्या महिन्यात भारताच्या आर्थिक सागरी क्षेत्रात घुसखोरी करणाऱ्या चिनी जहाज भारतीय नौदलाकडून इशारा मिळाल्यानंतर माघारी फिरले होते. चिनी नौदल वेगाने विस्तार असल्याचीही भारताला पूर्ण कल्पना मिळालेली आहे.