हिंगणघाट नराधमाचं ‘हैदराबाद’ सारखं करा : आमदार प्रणिती शिंदे
सोलापूर |महाईन्यूज|
वर्धा जिल्ह्यातील हिंगणघाट येथे शिक्षिकेला पेटवून दिल्याच्या घटनेविरोधात संपूर्ण राज्यभर आक्रोश वाढत असून आरोपीला फाशी देण्याची मागणी होत आहे. काँग्रेसच्या आमदार प्रणिती शिंदे यांनीही या घटनेबद्दल संताप व्यक्त करताना, ‘हिंगणघाटच्या नराधमाला हैदराबादसारखी काहीतरी शिक्षा द्या,’ अशी मागणी प्रणिती यांनी केली आहे.
हिंगणघाटमधील घटनेच्या विरोधात जिल्हा युवक काँग्रेसच्या वतीनं सोलापूरच्या जिल्हाधिकारी कार्यालयासमोर निदर्शनं करण्यात आली. त्यावेळी बोलताना प्रणिती शिंदे यांनी एकतर्फी प्रेमातून होणाऱ्या गुन्ह्यांबद्दल संताप व्यक्त केला. ‘या घटनेचा मी निषेध करते. पीडित तरुणीची प्रकृती लवकर सुधारेल, अशी प्रार्थना मी करते. कायदे वगैरे असून सुद्धा या नराधम लोकांची मानसिकता कधी बदलेल, माहीत नाही. मुलींची छेडछाड करणाऱ्यांचा ताबडतोब बंदोबस्त केला पाहिजे. प्रशासन व घरच्यानी पीडितेला पाठिंबा दिला पाहिजे, दिलासा दिला पाहिजे. तिच्या पाठीमागे भक्कमपणे उभे राहिले पाहिजे,’ अशी अपेक्षा त्यांनी व्यक्त केली.
‘कायद्याची भीतीच उरली नसल्याचं या घटनांमधून दिसतं. हिंगणघाटातील आरोपी जागेवरच पकडला गेला आहे. अशा परिस्थितीत कायदेशीर तपास, एफआयआर व अन्य बाबींची वाट पाहण्याची गरज नाही. गुन्हेगाराला तात्काळ कठोर शिक्षा देण्यासाठी पावलं उचलायला हवीत. या खटल्यांचा निकाल नव्वद दिवसांच्या आत लागला पाहिजे किंवा हैदराबादसारखं काहीतरी करा’, असं त्या म्हणाल्या.