शिवसेनेच्या मावळ-शिरुर उमेदवारांच्या विरोधात मनसैनिक घरोघरी करणार प्रचार
आमचा कोणालाही पाठिंबा नाही. आम्ही कोणाच्याही सभेत सहभागी होत नाही. स्वतंत्रपणे भाजप-शिवसेनेच्या विरोधात प्रचार करत आहोत असे स्पष्ट करत किशोर शिंदे म्हणाले, “मनसेप्रमुख राज ठाकरे यांनी पंतप्रधान नरेंद्र मोदी आणि अमित शहा यांच्याविरोधात हाक दिली आहे. त्यानुसार आम्ही भाजप-शिवसेना महायुतीच्या विरोधात प्रचार करत आहोत. प्रचाराची यंत्रणा उभारली आहे. पुणे जिल्ह्यातील चारही मतदारसंघात मनसैनिक कामाला लागले आहेत. मोदी, शहा यांच्यासोबत खासदार शिवाजीराव आढळराव, श्रीरंग बारणे का नको आहेत ? हे मनसैनिक जनतेला समजावून सांगणार आहेत. भाजपमुळे जनतेला होत असलेला त्रास सांगणार आहेत”
गणेश सातपुते म्हणाले, “मोदी आणि शहा मुक्त देश करायचा आहे. आम्ही कोणत्याही राजकीय पक्षाच्या व्यासपीठावर न जाता आम्ही स्वतंत्र भाजप-शिवसेना महायुतीच्या विरोधात प्रचार करणार आहोत. मोदी यांच्या एकधिकारशाहीमुळे होणा-या त्रासाची जनतेला आठवण करुन देणार आहोत. स्वायत्त संस्था धोक्यात आहेत. देशातील सनदी अधिकारी निवडणूक आयोगा विरोधात राष्ट्रपतीकडे तक्रार करत आहेत. त्यामुळे भाजपची ही भूमिका आम्ही घराघरात जाऊन सांगणार आहोत. राज ठाकरे यांच्या भाजपविरोधी भूमिकेचे जनतेने स्वागत केले आहे. त्यांची भूमिका आवडली आहे. नागरिकांची त्यांच्या सभेला गर्दी होत आहे. जनता आम्हाला साथ देत आहे” असेही ते म्हणाले.
