पिंपरी महापालिकेतील कर्मचारी वर्गातून नाराजीचा सूर
पिंपरी |महाईन्यूज|प्रतिनिधी
लोकसभेच्या निवडणुका होऊन वर्षे झाले, तर विधानसभा निवडणुका होवून दोन महिने उलटले आहेत. तरीही निवडणूक प्रक्रियेत काम करणा-या कर्मचाऱ्यांना त्यांचे मानधन अद्याप मिळालेले नाही. निवडणुक काळात तहान-भूक विसरुन काम केल्यानंतरही मोबादला मिळत नसल्याने अधिकारी-कर्मचारी वर्गातून नाराजी व्यक्त होत आहे.
लोकसभा निवडणुका एप्रिलमध्ये पुर्ण झाल्या. तर सप्टेंबर-आॅक्टोबरमध्ये विधानसभेच्या निवडणुका देखील झाल्या. या निवडणुकीसाठी पिंपरी चिंचवड महापालिकेतील अधिकारी-कर्मचारी वर्गासह अन्य शासकीय कार्यालयातील कर्मचारी कामकाजात सहभागी झाले होते. मावळ आणि शिरूर लोकसभा आणि पिंपरी, चिंचवड आणि भोसरी, मावळ विधानसभा मतदारसंघाच्या कामांसाठी महापालिकेतील कर्मचारी नेमले होते. याकरिता पालिकेतील सुमारे 3 हजार 140 कर्मचारी नेमण्यात आले होते. त्यामध्ये वर्ग दोन ते वर्ग चार या संवर्गातील अधिकारी आणि कर्मचाऱ्यांचा समावेश होता.
या कर्मचाऱ्यांचे एक महिन्याचे मूळ वेतन आणि ग्रेड पे एवढी रक्कम त्यांच्या खात्यात जमा करणे अत्यावश्‍यक असताना, त्याकडे दुर्लक्ष करण्यात आले आहे. निवडणुका होऊन दहा महिने उलटले, तरी मानधन अजून मिळालेले नाही. निवडणुकीच्या कामकाजासाठी लागणारी स्टेशनरी आणि अन्य बाबींचा खर्च सुरुवातीला देण्यात येतो. त्यानंतर कर्मचाऱ्यांना मानधन दिले जाते. शहरातील हजारो कर्मचाऱ्यांनी प्रशिक्षण आणि प्रत्यक्ष मतदानाच्या दिवशी काम केले. या कर्मचाऱ्यांना रात्री उशिरापर्यंत काम करावे लागते होते. त्या कामाचा मोबदला मिळत नसल्याने कर्मचा-यांतून नाराजी व्यक्त होत आहे.
दरम्यान, वर्ग एक आणि दोन साठी 43 जणाचे प्रत्येकी 49 हजार 500 रुपये, वर्ग तीन साठी 2 हजार 340 कर्मचा-यांचे प्रत्येकी 27 हजार 900 रुपये आणि वर्ग चार साठी 757 कर्मचा-यांचे प्रत्येकी 27 हजार 300 रुपये प्रमाणे असे एकूण 3 हजार 140 कर्मचा-यांचे मानधन मिळणे अपेक्षित आहे.
