श्रीनगर : लष्करप्रमुख बिपीन रावत यांनी आज शहीद जवान औरंगजेब यांच्या घरी जाऊन त्यांच्या कुटुंबीयांचे सांत्वन केले. ४४ राष्ट्रीय रायफल्समध्ये सेवेत असलेले औरंगजेब हे ईदसाठी सुट्टी घेऊन घरी आले असता दहशतवाद्यांनी त्यांचे अपहरण करून त्यांची हत्या केली होती. १४ जून रोजी त्यांचा मृतदेह आढळून आला होता.
औरंगजेब यांचे घर पूंछ जिल्ह्यात असून तिथे जाऊन रावत यांनी त्यांच्या कुटुंबीयांची भेट घेतली. यावेळी रावत यांनी शोक व्यक्त करताना औरंगजेब यांच्या कुटुंबीयांना धीर दिला.
औरंगजेब यांचे वडील मोहम्मद हनीफ हेही लष्करात होते. औरंगजेब यांच्या मृत्यूनंतर हनीफ यांनी तीव्र भावना व्यक्त केल्या होत्या. मोदी सरकारने औरंगेजबच्या मृत्यूचा बदला घ्यावा, अन्यथा आम्हीच बदला घेऊ, असे हनीफ तसेच औरंगेजब यांच्या भावाने ठणकावले होते. दरम्यान, औरंगजेब राष्ट्रीय रायफल्सच्या कमांडो ग्रुपमध्ये होता. याच कमांडो ग्रुपने हिजबुल मुजाहिदीनचा कमांडर समीर टायगरचा खात्मा केला होता.
