राम मंदिर कधी उभारणार ती तारीख सांगा-उद्धव ठाकरे
शिवसेना पक्षप्रमुख उद्धव ठाकरे आपल्या पूर्ण कुटुंबासह अयोध्येत दाखल झाले आहेत. संपूर्ण ठाकरे कुटुंब पहिल्यांदाच अयोध्या वारीच्या निमित्ताने राजकीय सीमोल्लंघन करताना दिसत आहे. दुपारी दोन वाजता उद्धव ठाकरे फैजाबाद विमानतळावर उतरले आहेत आणि त्यांचा अयोध्या दौरा सुरु झाला आहे. काही वेळापूर्वीच त्यांनी लक्ष्मण किला या ठिकाणी भेट दिली. सकाळी ११ वाजताच्या विमानाने ते दिल्लीकडे रवाना झाले होते.
अयोध्येतील क्षत्रिय, ब्राह्मण, वैश्य असे वेगवेगळे समाज यांना आपले म्हणणे कळावे म्हणून उद्धव ठाकरे हिंदीतून भाषण देणार आहेत असेही समजते आहे. रविवारी दुपारी १२ वाजता उद्धव ठाकरे पत्रकारांशी तर एक वाजता जनतेशी संवाद साधणार आहेत.
शिवनेरी गडावरच्या छत्रपती शिवाजी महाराजांच्या पदस्पर्शाने पावन झालेल्या मातीचा कलश घेऊन उद्धव ठाकरे अयोध्येत पोहचले आहेत. शिवनेरीवरच्या बाल शिवाजी आणि जिजामाता यांच्या पुतळ्याला अभिवादन करून उद्धव ठाकरेंनी तिथली माती सोबत घेतली आहे. संजय राऊत, राजन विचारे, एकनाथ शिंदे, विश्वनाथ महाडेश्वर हेदेखील अयोध्येत गेले आहेत.