‘जय मल्हार’ या मालिकेत खंडोबाची व्यक्तिरेखा साकारत प्रसिद्धीच्या शिखरावर पोहोचलेला अभिनेता लवकरच मोठ्या पडद्यावर झळकणार आहे. ‘तान्हाजी: द अनसंग वॉरियर’ या ऐतिहासिक चित्रपटात देवदत्त सूर्याजी मालुसरेंची भूमिका साकारणार आहे. या चित्रपटाच्या निमित्ताने देवदत्तला अजय देवगणसोबत काम करण्याची संधी मिळाली. या दोघांच्या स्वभावात व आवडीनिवडीत बरंच साम्य असल्याचं सेटवर अनेकांना जाणवलं.
‘पुणे टाइम्स’ला दिलेल्या मुलाखतीत देवदत्तने सेटवरच्या गमतीजमती सांगितल्या. चित्रपटाच्या शूटिंगदरम्यान त्याला ‘देवगण नागे’ असं नाव पडलं होतं. देवदत्तला गाड्यांची फार आवड आहे. त्याच्याकडे बाइक्स, सुपरबाइक्स आहेत, तर अजय देवगणच्या चित्रपटांमध्ये गाड्या उडवण्याची दृश्य हमखास असतात. देवदत्त सेटवर गाडी घेऊन गेला की अजय कौतुकानं त्या पाहायचा. त्यामुळे सेटवर देवदत्तला ‘देवगण नागे’ असं नाव पडलं. “आम्ही दोघंही दिसायला रावडी आहोत. त्यामुळे सेटवर अगदी दोघे भाऊच असल्यासारखं जमून गेलं,” असंही देवदत्तनं सांगितलं.
