मेहुल चोक्सीला आणखी एक दणका, थायलंडमधील कंपनी जप्त
पंजाब नॅशनल बँकेतील घोटाळ्याप्रकरणी फरार असलेल्या मेहुल चोक्सीला अंमलबजावणी संचालनालयाने (ईडी) दणका दिला आहे. थायलंडमधील मेहुल चोक्सीच्या कंपनीवर ईडीने जप्तीची कारवाई केली असून या कंपनीची किंमत भारतीय चलनानुसार 13 कोटी रुपये इतकी आहे.
थायलंडमधील एब्बेक्रेस्ट लिमिटेड या कंपनीवर ईडीने शुक्रवारी जप्तीची कारवाई केली. ही कंपनी गीतांजली समुहाअंतर्गत येते. ईडीने याबाबत माहिती देताना सांगितले की, आर्थिक गैरव्यवहार प्रतिबंधक कायद्यांतर्गत (पीएमएलए) तपास करताना असे निष्पन्न झाले की एब्बेक्रेस्ट लिमिटेड या कंपनीने गैरव्यवहार करुन पीएनबीतून जारी केलेल्या एलओयूचा लाभ घेतला होता. ही रक्कम 92. 3 कोटी रुपये इतकी होती. तपासात या मालमत्तेची माहिती समोर आल्यानंतर कंपनीच्या मालकीबाबत सखोल तपास करण्यात आला. यानंतरच कंपनीवर जप्तीची कारवाई करण्यात आली, असे ईडीच्या अधिकाऱ्यांनी सांगितले.