मुंबई इंडियन्स आणि चेन्नई सुपर किंग्समध्ये रंगणार आयपीएलचा पहिला सामना

19 सप्टेंबरपासून सुरु होणाऱ्या इंडियन प्रीमियर लीगच्या 13व्या सीझनचं शेड्यूल समोर आलं आहे. 13व्या सीझनची सुरुवात गतवर्षाची आयपीएल विजेता संघ मुंबई इंडियन्स आणि रनरअप चेन्नई सुपर किंग्समधील सामन्याने होणार आहे. आयपीएलच्या 13व्या सीझनची सुरुवात 29 मार्च रोजी होणार होती. परंतु, देशातील कोरोनाच्या वाढत्या प्रादुर्भावामुळे आयपीएल रद्द करण्यात आली होती. आता आयपीएलचे सामने भारताबाहेर होणार आहेत.

यंदाची आयपीएल 19 सप्टेंबरपासून दुबईमध्ये सुरु होणार असून काही दिवसांपूर्वी यासंदर्भात घोषणा करण्यात आली. त्यानंतर बीसीसीआयने रविवारी गव्हर्निंग काऊंन्सिलची बैठक बोलावली होती. या बैठकीत आयपीएलच्या 13व्या सीझनसंदर्भात सर्व औपचारिक गोष्टी पूर्ण करण्यात आल्या. बीसीसीआयकडून देण्यात आलेल्या माहितीनुसार, 13व्या सीझनचं आयोजन 19 सप्टेंबर ते 10 नोव्हेंबर दरम्यान पार पडणार आहे. यावर्षी पहिल्यांदाच आयपीएलचा अंतिम सामना वीकडेमध्ये खेळवण्यात येणार आहे.

इंडियन प्रीमियर लीगमधील 13वा सीझन 53 दिवस चालणार आहे. यादरम्यान 60 सामने खेळवण्यात येणार आहेत. संपूर्ण टुर्नामेंटच्या फॉरमॅटमध्ये कोणताही बदलाव करण्यात येणार नाही. 13व्या सीझनमध्ये 10 डबल हॅडर सामने खेळवले जाणार आहेत. सामन्याची सुरुवात भारतीय वेळेनुसार 7 वाजून 30 मिनिटांनी होणार आहे. तर डबल हॅडर सामन्यांच्या दिवशी सामना 3 वाजून 30 मिनिटांनी सुरु करण्यात येणार आहे.

20 ऑगस्ट रोजी दुबईला पोहोचले संघ

कोरोना व्हायरसचा धोका पाहता आयपीएल संघांना खेळाडूंचे रिप्लेसमेंटही मिळणार आहेत. बीसीसीआयने स्पष्ट केलं आहे की, कोणताही संघ 20 ऑगस्टआधी दुबईमध्ये जाणार नाही. कारण काही संघ 12 ऑगस्ट रोजी दुबईमध्ये जाण्याची योजना आखत होते.

पहिल्यांदाच आयपीएलचं आयोजन सप्टेंबर महिन्यात करण्यात येत आहे. ट्वेंटी-ट्वेंटी वर्ल्ड कप रद्द झाल्यानंतर बीसीसीआयसाठी आयपीएलचं आयोजन करण्याचा निर्णय घेतला.