महापालिका निवडणुका डोळ्यासमोर ठेवून विधायक कामांवर भर द्यावा – खासदार श्रीरंग बारणे
पिंपरी |महाईन्यूज|
‘शिवसेनेच्या कार्यकर्त्यांनी महापालिकेच्या २०२२ मधील निवडणुका नजरेसमोर ठेवून कार्यरत राहावे. विधायक कामांवर भर द्यावा,’ असे आवाहन खासदार श्रीरंग बारणे यांनी केले.
चिंचवड येथील राजेश आरसूळ, ज्योती भालके, संदीप भालके यांच्यासह काही कार्यकर्त्यांनी शिवसेनेत प्रवेश केला. यानिमित्त आयोजित कार्यक्रमात बारणे बोलत होते. पक्षाचे जिल्हाप्रमुख गजानन चिंचवडे, शहरप्रमुख योगेश बाबर, माजी आमदार अॅड. गौतम चाबूकस्वार, ऊर्मिला काळभोर, अनंत कोऱ्हाळे, अनिता तुतारे, नगरसेविका अश्विनी चिंचवडे, रेखा दर्शिले, विश्वजित बारणे या वेळी उपस्थित होते.
बारणे म्हणाले, ‘शिवसेनेच्या भगव्या ध्वजाचे स्मरण ठेवून गरजूंना मदतीचा हात द्यावा. अन्याय दूर करण्यासाठी पुढाकार घ्यावा. समाजामध्ये विधायक कामे केल्यास लोक निश्चित साथ देतील. पालिकेच्या आगामी निवडणुका नजरेसमोर ठेवून कार्यरत राहावे.’
पालिकेच्या निवडणुकीच्या अनुषंगाने नवीन मतदार नोंदणी, मतदार पुनर्निरीक्षण मोहीम आणि सभासद नोंदणी अभियान याबाबत जिल्हाप्रमुख चिंचवडे यांनी माहिती दिली. पदवीधर निवडणुकीचा संदर्भ देत महाविकास आघाडीच्या उमेदवारांचा प्रचार करण्याच्या सूचना दिल्या.
