पिंपरी|महाईन्यूज|प्रतिनिधी|
शहरात वाहनांच्या तोडफोडीचे सत्र कायम असून, बोपोडीतील रेल्वे गेटजवळ सहा रिक्षांची तोडफोड करून एका टेम्पोतील बॅटरी, टेप असा १४ हजारांचा ऐवज चोरून नेल्याचा प्रकार समोर आला आहे. या प्रकरणी खडकी पोलिस ठाण्यात गुन्हा दाखल करण्यात आला आहे.
राजू शेख (वय ३०, रा. बोपोडी ) यांनी याबाबत तक्रार दिली आहे. त्यानुसार अज्ञात व्यक्तीच्या विरोधात गुन्हा दाखल करण्यात आला आहे. पोलिसांनी दिलेल्या माहितीनुसार, राजू रिक्षाचालक आहेत. दोन दिवसांपूर्वी त्यांनी घराजवळ रस्त्यावर रिक्षा उभी केली होती. त्या वेळी अज्ञाताने शेख यांच्या रिक्षासह इतर पाच रिक्षांच्या काचांची तोडफोड करून नुकसान केले, तर टेम्पोतील बॅटरी, टेप असा १४ हजारांचा ऐवज चोरून नेला. या प्रकरणी सहायक पोलिस निरीक्षक पुरुषोत्तम देवकर अधिक तपास करत आहेत.
