- दबंग दिल्ली आणि बंगाल वॉरियर्स यांच्यात आज विजेतेपदासाठी लढत
प्रो कबड्डी लीगच्या सातव्या हंगामाची सांगता ही सत्तांतरणाने होणार आहे. दबंग दिल्ली आणि बंगाल वॉरियर्स यांच्यात शनिवारी ट्रान्सस्टॅडिया क्रीडा संकुलात होणाऱ्या अंतिम लढतीनंतर ‘सत्ता’ कुणाची हे स्पष्ट होऊ शकेल.
दबंग दिल्लीने यंदाच्या हंगामात वर्चस्वपूर्ण कामगिरी करीत गुणतालिकेत अग्रस्थान प्राप्त केले. परंतु बंगाल वॉरियर्सचे आव्हान त्यांना मोडीत काढता आलेले नाही. त्यामुळेच या लढतीची उत्कंठा शिगेला पोहोचली आहे. दिल्ली आणि बंगाल हे दोन्ही संघ पहिल्या हंगामापासून प्रो कबड्डीत असले तरी अंतिम फेरी मात्र प्रथमच खेळत आहेत. बंगालने तिसऱ्यांदा बाद फेरीचा टप्पा ओलांडून ही मजल मारली आहे, तर पहिल्या पाच हंगामांमध्ये साखळीतच गटांगळ्या खाणाऱ्या दिल्लीने सलग दुसऱ्यांदा बाद फेरीत झेप घेतली आहे. त्यामुळे दोन्ही संघांसाठी विजेतेपद महत्त्वाचे ठरणार आहे. बंगालचे प्रशिक्षक बी. सी. रमेश यांनी भारताचे प्रतिनिधित्व केले, तेव्हा दिल्लीचे प्रशिक्षक किशन कुमार हुडा त्यांचे मार्गदर्शक होते. त्यामुळे गुरू-शिष्यांची आगळी जुगलबंदी मैदानावर पाहायला मिळणार आहे.
यंदाच्या हंगामात बंगाल-दिल्ली यांच्यातील पहिला सामना ३०-३० असा बरोबरीत सुटला, तर दुसऱ्या सामन्यात बंगालने दिल्लीला ४२-३३ अशी धूळ चारली होती. त्या सामन्यात बंगालचा भरवशाचा चढाईपटू मणिंदर सिंगला दुखापत झाली होती. त्यामुळे त्यानंतरच्या सामन्यांना त्याला मुकावे लागले होते. परंतु अंतिम सामन्यासाठी सज्ज असल्याचे त्याने स्पष्ट केले आहे.
