पुण्यातील सीएमईमध्ये सरावादरम्यान 2 जवानांचा मृत्यू ,तर पाच जण गंभीर जखमी
पुणे | महाईन्यूज |
पुण्यातील दोपोडी येथील लष्करी अभियांत्रिकी महाविद्यालयात म्हणजेच सीएमईमध्ये पूल बांधणीच्या सरावादरम्यान झालेल्या भीषण अपघातात दोन जवानांचा मृत्यू झाला आहे, तर पाच जण गंभीर जखमी झाले आहेत. जखमींना खडकी येथील लष्कराच्या रुग्णालयात उपचारासाठी दाखल करण्यात आले आहे. जखमींमध्ये जेसीओ दर्जाच्या एका अधिकाऱ्याचा समावेश आहे. एएनआय या वृत्तवाहीनीने याबाबतची माहिती दिली आहे.
मृत जवानांपैकी केरळचे रहिवासी असलेले संजीवन पी. के. असे एका जवानाचे नाव असून दुसऱ्या जवानाचे नाव अद्याप समजू शकलेले नाही. केबल्सच्या सहाय्याने दोन टॉवरदरम्यान उभारण्यात आलेला पूल उघडण्याच्या प्रशिक्षणादरम्यान एक टॉवर अचानक कोसळला. या भीषण अपघातात टॉवरखाली नऊ सैनिक अडकून पडले यांपैकी दोन जणांचा जागीच मृत्यू झाला आहे.
युद्ध काळात लष्कराला मार्ग तयार करुन देण्यासाठी पूल उभारणे आणि इतर अभियांत्रिकीची कामे सीएमईतून जवानांना शिकवली जातात. यासाठी दररोजचा सराव कार्यक्रमही तयार करण्यात आलेला असतो. अशाच एका सरावादरम्यान गुरुवारी ही दुर्घटना घडली.