‘अच्छे दिन’चा परिणाम?….अमित शहांची संपत्ती ७ वर्षात तीनपट वाढली!
गांधीनगर: भाजपचे राष्ट्रीय अध्यक्ष अमित शहा यांची संपत्ती गेल्या सात वर्षात तीनपट वाढली आहे. गुजरातच्या गांधीनगर लोकसभा मतदारसंघातून शहा यांनी नामांकन अर्ज दाखल केला असता त्यातून ही बाब उघड झाली आहे. राज्यसभा सदस्य म्हणून मिळणारं मानधन, घरभाडे आणि शेती हीच मिळकतीची साधनं असल्याचंही त्यांनी प्रतिज्ञापत्रात नमूद केलं आहे.
अमित शहा आणि त्यांच्या पत्नीची एकूण चल-अचल संपत्ती ३८. ८१ कोटी आहे. २०१२मध्ये त्यांची संपत्ती ११.७९ कोटी होती. त्यात त्यांना वारसा हक्काने मिळालेल्या २३.४५ कोटी संपत्तीचाही समावेश आहे. शहा पती-पत्नीच्या बचत खात्यात २७.८० लाख रुपये आहे. त्याशिवाय ९.८० लाख रुपयांचं फिक्स्ड डिपॉझिटही त्यांच्या नावावर असल्याचं या प्रतिज्ञापत्रात नमूद करण्यात आलं आहे.
शहा यांच्याकडे एकूण २० हजार ६३३ रुपये आणि त्यांच्या पत्नीकडे ७२ हजार ५७८ रुपये रोख रक्कम असल्याचंही या प्रतिज्ञापत्रात नमूद करण्यात आलं आहे. २०१७मध्ये शहा यांनी राज्यसभेसाठी नामांकन अर्ज भरला होता. त्यावेळी त्यांनी त्यांची एकूण संपत्ती ३४.३१ कोटी रुपये दाखवली होती. २०१७ पासून ते आतापर्यंत त्यांच्या संपत्तीत ४.५ कोटी रुपयांची वाढ झाली आहे.
शहांकडे कार नाही
शहा यांनी त्यांच्या आणि त्यांच्या पत्नीकडे एकही कार नसल्याचं प्रतिज्ञापत्रात नमूद केलं आहे. शिवाय कॉमर्समध्ये पदवीच्या दुसऱ्या वर्षापर्यंत शिक्षण घेतल्याचंही नमूद केलं आहे. त्यांच्याविरोधात चार गुन्हे दाखल असून त्यापैकी दोन बिहारमध्ये आणि दोन पश्चिम बंगालमध्ये दाखल असल्याचंही प्रतिज्ञापत्रात स्पष्ट करण्यात आलं आहे.
