शिंदे गटातून बुलडाण्याचे खासदार प्रतापराव जाधव यांना केंद्रीय मंत्रिमंडळात संधी मिळणार?
भाजपकडून एकनाथ शिंदे यांच्या गटाला बळ दिलं जाण्याची शक्यता
केंद्रीय मंत्रिमंडळात शिंदे समर्थक खासदाराची वर्णी लागण्याची शक्यता वर्तवली जात आहे
नवी दिल्ली । महाईन्यूज । विशेष प्रतिनिधी ।
शिवसेनेत बंड करुन उठाव करुन बाहेर पडणाऱ्या एकनाथ शिंदे यांना भाजपनं मुख्यमंत्रिपद दिलं. एकनाथ शिंदे गटाची बाजू भक्कम करण्यासाठी भाजप एकनाथ शिंदे यांच्या समर्थक खासदारांना केंद्रीय मंत्रिमंडळात संधी देण्याची शक्यता आहे. शिंदे समर्थक खासदारांना हिवाळी अधिवेशनापूर्वी केंद्रीय मंत्रिपद दिलं जाण्याची शक्यता असल्याची माहिती सूत्रांनी दिली आहे. शिंदे गटातून बुलडाण्याचे खासदार प्रतापराव जाधव यांचं नाव आघाडीवर असल्याची माहिती सूत्रांकडून मिळाली आहे.
महाराष्ट्रातील राज्य मंत्रिमंडळाच्या विस्तारानंतर शिंदे गटाला केंद्रीय मंत्रिमंडळात स्थान मिळण्याची शक्यता आहे. केंद्रीय मंत्रिमंडळात एकनाथ शिंदे यांच्या समर्थक खासदारांना मंत्रिपद देऊन उद्धव ठाकरेंसमोर आव्हान निर्माण करण्याचा भाजपचा प्रयत्न असल्याचं बोललं जात आहे. २०१९ मध्ये महाराष्ट्रात महाविकास आघाडी सरकार स्थापन होत असताना शिवसेना एनडीएतून बाहेर पडली. शिवसेनेचे खासदार अरविंद सावंत यांनी केंद्रीय मंत्रिपदाचा राजीनामा दिला. बिहारचे मुख्यमंत्री नितीश कुमार यांच्या पक्षाचे आर.सीपी. सिंग यांना पुन्हा खासदार होता न आल्यानं त्यांना देखील केंद्रीय मंत्रिपदाचा राजीनामा द्यायला लागला. त्यामुळं आता महाराष्ट्रात भाजपला पुन्हा सत्तेत आणणाऱ्या एकनाथ शिंदे यांच्या गटाला केंद्रीय मंत्रिमंडळात हिवाळी अधिवेशनापूर्वी स्थान मिळू शकते.
धोनीचा नरेंद्र मोदींना पाठिंबा; पंतप्रधानांनी आव्हान करताच पाहा काय केलं
शिवसेनेच्या १८ खासदारांपैकी १२ खासदार एकनाथ शिंदे यांच्या गटात गेले आहेत. एकनाथ शिंदे यांच्या गटातील १२ खासदारांपैकी काही खासदारांना केंद्रीय मंत्रिपदाची लॉटरी लागण्याची शक्यता आहे. एकनाथ शिंदे समर्थक खासदारांच्या गटाला केंद्रीय मंत्रिमंडळात कॅबिनेट, राज्यमंत्रिपद किंवा राष्ट्रीय पातळीवरील एखाद्या समितीचं अध्यक्षपद दिलं जाण्याची शक्यता आहे.
प्रतापराव जाधव यांचं नाव आघाडीवर
श्रीकांत शिंदे, राहुल शेवाळे , हेमंत पाटील ,प्रतापराव जाधव ,कृपाल तुमाणे,भावना गवळी,श्रीरंग बारणे ,संजय मंडलिक ,धैर्यशील माने ,सदाशिव लोखंडे ,हेमंत गोडसे,राजेंद्र गावित या बारा खासदारांनी मुख्यमंत्री एकनाथ शिंदे यांच्या गटात जाण्याचा निर्णय घेतला. एकनाथ शिंदे यांच्या गटातील प्रतापराव जाधव यांचं नाव आघाडीवर असल्याची माहिती आहे.
