Union Budget : २०२४चा अंतरिम अर्थसंकल्प ‘या’ दिवशी सादर होण्याची शक्यता
Budget 2024 : मोदी सरकार लवकरच दुसऱ्या टर्मसाठी अंतिम अर्थसंकल्प सादर करू शकते. तर संसदेचे अर्थसंकल्पीय अधिवेशन ३१ जानेवारीपासून सुरू होऊ शकते. वृत्तानुसार, देशाच्या राष्ट्रपती द्रौपदी मुर्मू ३१ जानेवारी रोजी संसदेच्या दोन्ही सभागृहांना संबोधित करणार आहेत. त्याच वेळी, १ फेब्रुवारीला केंद्रीय अर्थमंत्री निर्मला सीतारामन केंद्र सरकारचा अर्थसंकल्प सादर करू शकतात.
देशात निवडणुकीच्या वर्षात दोनदा अर्थसंकल्प सादर केला जातो. पहिले निवडणुकीपूर्वी आणि दुसरे सरकार स्थापनेनंतर. पहिल्या अर्थसंकल्पाला अंतरिम अर्थसंकल्प आणि दुसऱ्याला सर्वसाधारण अर्थसंकल्प म्हणतात. यापूर्वी २०१९ च्या लोकसभा निवडणुकीपूर्वी अंतरिम अर्थसंकल्प सादर करण्यात आला होता.
हेही वाचा – भारत-अफगाणिस्तान यांच्यात आज पहिला टी-२० सामना; ‘या’ फलंदाजाची माघार
आतापर्यंत मिळालेल्या माहितीनुसार, संसदेच्या अर्थसंकल्पीय अधिवेशनात राष्ट्रपतींच्या अभिभाषणानंतर ३१ जानेवारीला आर्थिक सर्वेक्षण अहवालही सादर केला जाऊ शकतो. आर्थिक सर्वेक्षण हे सोप्या भाषेत लेखासारखे आहे. गेल्या वर्षभरातील लेखाजोखा लक्षात घेऊन पुढील वर्षाच्या अर्थसंकल्पाची रूपरेषा ठरविली जाते.
संसदेचे हे अर्थसंकल्पीय अधिवेशन मोदी सरकारच्या दुसऱ्या कार्यकाळातील शेवटचे बजेट असेल. काही महिन्यांनी देशात लोकसभा निवडणुका होणार आहेत. अशा स्थितीत अर्थसंकल्पात सरकार आपली तिजोरी जनतेसाठी खुली करू शकेल, अशी अपेक्षा आहे. निवडणुकीच्या हंगामातील या अर्थसंकल्पात मोदी सरकार देशातील शेतकरी आणि महिलांसाठी अनेक मोठ्या घोषणा आणि योजना जाहीर करू शकते, अशी अपेक्षा आहे.
