बृजभूषण सिंह यांना कोण ओळखत नाही? आम्ही एकत्र जेवतो : संजय राऊत

‘बृजभूषण शरण सिंह यांना कोण ओळखत नाही? ते खासदार आहेत. आम्ही एकत्र बसतो, एकत्र जेवतो. फोटो व्हायरल झाले म्हणजे काय झालं? मनसेतील नेत्यांचा अभ्यास कच्चा आहे, त्यांनी संसदेचा अभ्यास करावा,’ असा सल्ला संजय राऊत यांनी दिला आहे. तसंच एकाच सभागृहात लोक बसतात. आसपास असतात आणि चहापानही करतात. आम्ही योगींसोबतही चहापान करतो, म्हणून काय राज ठाकरेंना अडवण्यासाठी आम्ही योगींनाही रसद पुरवली का? असा खोचक सवाल करत राऊत यांनी मनसेचा समाचार घेतला आहे.

मनसे नेत्यांनी काय म्हटलं आहे?

काही वर्षांपूर्वी महाराष्ट्रात एका कुस्ती स्पर्धेचं आयोजन करण्यात आलं होतं. या स्पर्धेदरम्यान शरद पवार आणि बृजभूषण सिंह हे एकाच व्यासपीठावर होते. याच कार्यक्रमाचा फोटो आता मनसे नेत्यांकडून शेअर केला जात आहे. मनसेचे सरचिटणीस सचिन मोरे आणि मनसे प्रवक्ते संदीप देशपांडे यांनी हे फोटो ट्वीट करत राष्ट्रवादीला लक्ष्य केलं आहे.

‘तेल लावलेले पैलवान आणि गुडघ्यात अक्कल असलेले पैलवान यांची राजसाहेबांविरोधात झालेली युती स्पष्ट दिसत आहे,’ असं संदीप देशपांडे यांनी म्हटलं आहे.

दरम्यान, भाजपचे अनेक नेते राज ठाकरे यांच्या अयोध्या दौऱ्याचं समर्थन करत असताना या दौऱ्याला आक्रमक विरोध करणाऱ्या बृजभूषण सिंह यांना ताकद कुणी दिली, यावरून आरोप प्रत्यारोप सुरू आहेत. बृजभूषण यांच्या आधारे भाजप नेतृत्वानेच राज ठाकरेंचं खच्चीकरण केल्याचा दावा महाविकास आघाडीकडून करण्यात येत आहे. तर दुसरीकडे, मनसेने मात्र शरद पवार यांच्याकडे बोट दाखवल्याचं पाहायला मिळत आहे.