भावजयीला गावठी कट्टा दाखवताना दिराकडून ट्रिगर ओढलं गेल्याने गोळी थेट भावजयीच्या डोक्यातून आरपार

कोपरगाव तालुक्यातील पोहेगाव येथे गुरुवारी (७ जुलै) सकाळी ही घटना घडली आहे. याबाबत प्रत्यक्षदर्शी कुटुंबियांकडून मिळालेल्या माहितीनुसार, आरोपी विशाल भालेराव हा महिलेचा दिर आहे. त्याने बाहेरून गावठी कट्टा आणला होता. हा गावठी कट्टा भावजयी सुनिता भालेराव (वय ३२) यांना दाखवत असताना आरोपीकडून ट्रिगर ओढला गेला आणि गोळी सुनिता भालेराव यांच्या डोक्यात आरपार घुसली. घटना घडल्यानंतर आरोपी दिर घटना स्थळावरून पसार झाला.

घटनेची माहिती समजताच शिर्डीचे उपविभागीय पोलीस अधिकारी संजय सातव, पोलीस उपनिरीक्षक देविदास माळी, सहायक पोलीस उपनिरीक्षक संभाजी पाटील, पोलीस हवालदार नितीन सानप, रमेश शेख, बाळकृष्ण वर्पे आदींनी घटनास्थळी धाव घेतली.

गोळी डोक्यातून आरपार, भावजयी रक्ताच्या थारोळ्यात

रक्ताच्या थारोळ्यात पडलेल्या सुनिता यांना आगोदर खाजगी रुग्णालयात, त्यानंतर शिर्डी आणि नंतर लोणी येथील प्रवरा ग्रामीण रुग्णालयात उपचारासाठी दाखल करण्यात आले. गोळी थेट डोक्यातून आरपार घुसल्याने सुनिता भालेराव या गंभीर जखमी झाल्या होत्या. दरम्यान, आरोपीचा शोध घेण्यासाठी शिर्डी पोलिसांचे पथक रवाना झाले. मात्र, उपाचार सुरू असताना सुनीता भालेराव यांचा दुर्दैवी मृत्यू झाला. तर फरार झालेला आरोपी दिर विशाल भालेराव याला पोलिसांनी मोठ्या शिताफीने ताब्यात घेतले आहे.

गोळी चुकून सुटली की मारली, चर्चांना उधाण

आरोपीकडून चुकून गोळी सुटली की मारली अशा चर्चांना उधाण आले आहे. आरोपीकडे अनधिकृत गावठी कट्टा आला कुठून? आरोपीची गुन्हेगारी पार्श्वभूमीवर आहे का? याचा शोध पोलिसांना घ्यावा लागणार आहे. या घटनेने कोपरगाव तालुक्यासह अहमदनगर जिल्ह्यात खळबळ उडाली आहे.