ठाणे जिल्ह्यात स्वाइन फ्लूने वाढवला ताप; शिरकाव केल्याने ठाणेकरांची चिंता वाढली
![Swine flu raises fever in Thane district; Thanekar's anxiety increased with the entry](https://mahaenews.com/wp-content/uploads/2022/07/Swine-flu-raises-fever-in-Thane-district-Thanekars-anxiety-increased-with-the-entry.jpg)
ठाणे: ठाणे जिल्ह्यात स्वाइन फ्लूने जुलैमध्ये शिरकाव केल्याने ठाणेकरांची चिंता वाढली आहे. गेल्या चार दिवसांत ठाणे पालिका क्षेत्रात ३२ नवे रुग्ण आढळले. गुरुवारी २५ रुग्ण आढळले होते. एकूण ८५ रुग्णांची नोंद झाली. ठाणे, कल्याण-डोंबिवली शहरात स्वाइन फ्लूचा प्रसार मोठ्या प्रमाणात असल्याचे दिसून येत आहे. ठाणे शहरात शुक्रवारी आणखी एका रुग्णाचा स्वाइन फ्लूने मृत्यू झाला. जिल्ह्यात या आजाराने मृत्यू झालेल्यांची संख्या चारवर पोहोचली आहे. करोनानंतर आता स्वाइन फ्लूचे आव्हान आरोग्य विभागासमोर उभे राहिले आहे.
ठाणे शहरात गुरुवारी एकाचा मृत्यू
ठाणे शहरात यापूर्वी स्वाइन फ्लूमुळे दोन महिलांचा मृत्यू झाला. तर गुरुवारी एका ४९ वर्षांच्या रुग्णाचा मृत्यू झाला. सहव्याधी असलेला हा रुग्ण १९ जुलै रोजी उपचारासाठी दाखल झाला. त्यावेळी ताप जास्त असल्यामुळे त्याला अर्धांगवायूचा झटका आला. त्याची २६ जुलै रोजी स्वाइन फ्लूची चाचणी केली असता, त्याला स्वाइन फ्लूचे निदान झाले. मात्र उपचारादरम्यान त्याचा मृत्यू झाल्याचे पालिकेच्या आरोग्य विभागाकडून सांगण्यात आले.