मुंबई: राज्य विधिमंडळाच्या पावसाळी अधिवेशनाला बुधवारपासून सुरुवात होत आहे. या अधिवेशनापूर्वीच भाजप नेते मोहित कंबोज यांनी एक ट्वीट करत खळबळ माजवली आहे. राष्ट्रवादी काँग्रेसच्या बड्या नेत्यावर कारवाई होण्याचे संकेत कंबोज यांनी दिले आहेत. मोहित कंबोज यांच्या या वक्तव्याचा रोख अजित पवार यांच्या दिशेने असल्याचे सांगितले जाते. त्यावर आता विरोधकांकडून मोठ्याप्रमाणात आक्रमक अशा प्रतिक्रिया येत आहेत.
राष्ट्रवादी काँग्रेसचे नेते अमोल मिटकरी यांनीही या प्रकरणी मोहित कंबोज यांच्यावर जोरदोर टीका केली आहे. मोहित कंबोज हा भाजपचा भोंगा आहे. तो काय पुर्णवेळ ईडीच्या कार्यालयात बसतो का याची कारवाई व्हायला हवी असंही ते म्हणाले.
“मोहित कंबोज हा ब्रह्मज्ञान घेतलेला व्यक्ती आहे का. याला कसं माहिती पडतं की ईडी आणि सीबीआय कुठे कारवाई करणार आहे. हा ईडी कार्यालयात पुर्णवेळ बसणारा नेता आहे का, याचीही चौकशी झाली पाहिजे. मोहित कंबोज हा फक्त भाजपचा भोंगा आहे. त्याला दुसरं काहीही जमत नाही. पावसाळी अधिवेशनाच्या तोंडावर चर्चा भरकटवण्याचा त्याचा हा प्रयत्न आहे”, असं अमोल मिटकरी म्हणाले.
मोहित कंबोजांचं एक ट्वीट आणि राजकारणात खळबळ
पावसाळी अधिवेशनात विरोधी पक्षनेते अजित पवार यांच्याकडून अनेक मुद्द्यांवरून सरकारला घेरण्याची शक्यता आहे. अजित पवार (Ajit Pawar) यांचा विधिमंडळातील अनुभव आणि त्यांचा आक्रमक बाणा पाहता ते अडचणीचे प्रश्न विचारून सरकारची कोंडी करू शकतात. गलितगात्र अवस्थेत असलेल्या काँग्रेस आणि अर्ध्यामुर्ध्या शिवसेनेकडे पाहता या अधिवेशनात विरोधकांची सर्व मदार राष्ट्रवादी काँग्रेसवर (NCP) असल्याचे स्पष्टपणे दिसत आहे. त्यामुळे विरोधी पक्षनेते असलेले अजित पवार या अधिवेशनात सरकारला घेरण्यासाठी पुढाकार घेतील, असा अंदाज होता. मात्र, आता अधिवेशनापूर्वीच भाजप नेते मोहित कंबोज यांनी केलेल्या एका ट्वीटमुळे राष्ट्रवादी काँग्रेसच्या बड्या नेत्यावर कारवाई होण्याचे संकेत मिळत आहेत.
मोहित कंबोज यांचा आजवरचा लौकिक पाहता त्यांनी भाकीत केलेले बहुतांश नेते तुरुंगात गेले आहेत. त्यामुळे आता कारवाईच्या भीतीने पावसाळी अधिवशेनात अजित पवार आणि राष्ट्रवादी काँग्रेस बॅकफूटवर जाऊ शकतात, अशी चर्चा रंगायला सुरुवात झाली आहे.
समाजासाठी अहोरात्र झटणारा सहकारी आपण गमावला, विनायक मेटेंच्या निधनानंतर अजितदादांची प्रतिक्रिया
