पिंपळे सौदागर- रहाटणी प्रभाग २८ मध्ये शत्रुघ्न काटे यांच्या नेतृत्वाखाली भाजपाची भव्य पदयात्रा

पिंपरी-चिंचवड: पिंपरी-चिंचवड महानगरपालिकेच्या प्रभाग क्रमांक २८ मध्ये भारतीय जनता पार्टीच्या प्रचार मोहिमेला आज भव्य पदयात्रेद्वारे जोरदार सुरुवात झाली. भाजपाचे प्रमुख उमेदवार शत्रुघ्न काटे यांच्या नेतृत्वाखाली निघालेल्या या पदयात्रेला नागरिकांचा उत्स्फूर्त प्रतिसाद लाभला.

सकाळी ९ वाजता पिंपळे सौदागर येथून सुरू झालेली पदयात्रा स्वराज गार्डन चौक, सेव्हन स्टार लेन, गोविंद गार्डन रोड, कुणाल आयकॉन रोड, शिवार चौक, कोकणे चौक आणि रहाटणी चौक मार्गे विमल गार्डन चौक येथे समारोपाला पोहोचली. संपूर्ण मार्गावर शत्रुघ्न काटे यांचे ठिकठिकाणी स्वागत करण्यात आले. कार्यकर्ते, महिला, ज्येष्ठ नागरिक आणि युवक मोठ्या संख्येने या पदयात्रेत सहभागी झाले होते.

पदयात्रेदरम्यान शत्रुघ्न काटे यांनी नागरिकांशी थेट संवाद साधत प्रभागातील मूलभूत प्रश्न, पायाभूत सुविधा, रस्ते, पाणीपुरवठा, स्वच्छता आणि वाहतूक यांसारख्या विषयांवर चर्चा केली. पिंपरी-चिंचवड शहराने मेट्रो सिटी म्हणून केलेली वाटचाल, उद्योग व आयटी क्षेत्रातील प्रगती आणि कष्टकरी कामगारांच्या योगदानामुळे शहराला मिळालेली ओळख यावर त्यांनी भर दिला.

हेही वाचा –  ‘नवी मुंबई हे भविष्यातील आर्थिक केंद्र; या शहराच्या विकासात कोणालाही अडथळा आणू देणार नाही’; मुख्यमंत्री देवेंद्र फडणवीस

“पिंपरी-चिंचवडचा विकासाचा प्रवास थांबू न देता अधिक वेगाने पुढे नेण्यासाठी दूरदृष्टी असलेले आणि ठोस निर्णय घेणारे नेतृत्व आवश्यक आहे. गेल्या दहा वर्षांत भाजपाने हे कृतीतून सिद्ध केले आहे,” असे मत शत्रुघ्न काटे यांनी व्यक्त केले. आगामी काळात प्रभाग २८ चा विकास अधिक गतिमान करण्याचा निर्धारही त्यांनी यावेळी बोलून दाखवला.

या पदयात्रेत शत्रुघ्न काटे यांच्या पॅनेलमधील काटे अनिता संदीप (सर्वसाधारण – महिला), भिसे कुंदा संजय (सर्वसाधारण – महिला) आणि काटे संदेश रामचंद्र (सर्वसाधारण) हे उमेदवारही सहभागी होते. गुरुवार, दि. १५ जानेवारी २०२६ रोजी सकाळी ७.३० ते सायंकाळी ५.३० वाजेपर्यंत मतदान होणार असून, ‘कमळ’ चिन्हासमोर बटन दाबून भाजपाच्या चारही उमेदवारांना प्रचंड बहुमताने विजयी करण्याचे आवाहन शत्रुघ्न काटे यांनी नागरिकांना केले. पदयात्रेमुळे प्रभागातील वातावरण उत्साही व जोशपूर्ण झाले असल्याचे चित्र दिसून आले.

महाईन्यूज-X वर फॉलो करा : महाईन्यूजला instagram वर फॉलो करा

“प्रभाग क्रमांक २८ मधील प्रत्येक नागरिकाच्या मूलभूत गरजा, सुरक्षितता आणि दर्जेदार जीवनमान हेच माझे सर्वोच्च प्राधान्य राहील. विकास फक्त कागदावर नाही, तर तो प्रत्यक्ष रस्त्यावर, घराघरांत आणि नागरिकांच्या रोजच्या आयुष्यात दिसला पाहिजे. पिंपरी-चिंचवडचा विकासाचा वेग अधिक वाढवत, सर्वांना सोबत घेऊन पुढे जाण्याचा माझा ठाम संकल्प आहे.”

– शत्रुघ्न काटे, उमेदवार, भाजपा, प्रभाग- 28.