दिव्यांग पती-पत्नीवर प्राणघातक हल्ला: पत्नीचा मृत्यू; जखमी पतीवर रुग्णालयात उपचार सुरू
अकोला : दिव्यांग पती-पत्नीवर प्राणघातक हल्ला करण्यात आल्याची घटना अकोल्यात घडली आहे. या हल्ल्यात गंभीर जखमी झालेल्या पत्नीचा मृत्यू झाला असून जखमी पतीवर रुग्णालयात उपचार सुरू आहे. अकोला जिल्ह्यातील तेल्हारा तालुक्यातील हिवरखेड येथील स्वस्तिक कॉलनीत ही घटना घडली. हल्ला झालेली पती-पत्नी अंध असून त्यांची आर्थिक परिस्थिती अतिशय बिकट आहे. छोट्या-मोठ्या कार्यक्रमात गाणी म्हणून ते आपला उदरनिर्वाह करत असत. कौटुंबिक वादातून या दोघांवर हल्ला करण्यात आल्याची माहिती आहे.
मिळालेल्या माहितीनुसार, हिवरखेड येथील स्वस्तिक कॉलनीत राहणाऱ्या शांताराम कंडारे (वय ३०) आणि पत्नी सत्यभामा शांताराम कंडारे (वय २८) या दोघांवर मोठ्या भावाने प्राणघातक हल्ला केला. या हल्ल्यात सत्यभामा कंडारे यांचा मृत्यू झाला, तर शांताराम कंडारे हे गंभीर जखमी झाले असून त्यांच्यावर अकोल्यातील शासकीय रुग्णालयात उपचार सुरू आहे. या घटनेची माहिती हिवरखेड पोलिसांना मिळताच आयपीएस अधिकारी रितू खोकर, पोलीस निरीक्षक विजय चव्हाण आणि तेल्हाराचे पोलीस निरीक्षक ज्ञानोबा फड यांनी घटनास्थळी भेट दिली.
मोठ्या भावानेच केला प्राणघात हल्ला
शांताराम कंडारे यांच्या मोठ्या भावाने या दोघांवर रविवारी ११ वाजेच्या सुमारास हल्ला केला. विनोदने कौटुंबिक वादातून हा हल्ला केल्याची माहिती आहे. पाणी सांडण्यावरून या दोघांमध्ये वाद झाला आणि वादाचं रूपांतर थेट प्राणघातक हल्ल्यामध्ये झालं. शांताराम आणि त्याच्या पत्नीवर हल्ला केल्यानंतर विनोद हा घटनास्थळावरून पसार झाला होता. त्याच्यासोबत आईनेही पळ काढला. त्यानंतर पोलिसांनी सापळा रचून दोघांना ताब्यात घेतलं आहे. आरोपींना आता न्यायालयात हजर करण्यात येणार आहे.
