पिंपरी l प्रतिनिधी
मैत्रिणीच्या कारणावरून वाद झाल्याने आठ जणांनी दोघांना मारहाण केली. एकावर हत्याराने वार केले. त्यांनतर भांडण मिटवण्यासाठी गेल्यानंतर पुन्हा मारहाण केली. याप्रकरणी आठ जणांच्या विरोधात गुन्हा दाखल करण्यात आला आहे. ही घटना 2 मार्च रोजी रात्री थेरगाव येथे घडली.
क्रिश (वय 19), क्रिशची बहीण मोना (वय 20), सौरव गुंजाळ (वय 19), रोहित गोयर (वय 21, सर्व रा. थेरगाव) अनोळखी तीन ते चार जणांच्या विरोधात गुन्हा दाखल करण्यात आला आहे. सविता संदीप तरडे (वय 35, रा. काळेवाडी) यांनी शनिवारी (दि. 5) वाकड पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी यांचा मुलगा प्रेम तरडे याच्या मैत्रिणीच्या कारणावरून झालेल्या वादाच्या रागातून आरोपींनी प्रेम आणि त्याचा मित्र महेश पलमट्टे यांना लाथाबुक्क्यांनी मारहाण केली. आरोपी सौरव याने महेश याच्यावर धारदार हत्याराने वार करून त्याला जखमी केले.
हे भांडण मिटवण्यासाठी फिर्यादी यांचे पती, मुलगा प्रेम आणि त्याचा अमित्र महेश असे तिघेजण गेले असता आरोपींनी पुन्हा वाद घालून त्यांना लाथाबुक्क्यांनी मारहाण केली. आरोपी सौरव याने पुन्हा महेशला बांबूने मारले व सर्वांना शिवीगाळ केली असल्याचे फिर्यादीत म्हटले आहे. वाकड पोलीस तपास करीत आहेत.
