नागपूरः जरीपटका बस थांबा परिसरात जमावाने पाच जणांवर सशस्त्र हल्ला केल्याच्या माहितीने जरीपटका पोलिसांची तासभर चांगलीच तारांबळ उडाली. पोलिसांनी संपूर्ण परिसर पिंजून काढला. मात्र, अशी कोणतीही घटना घडली नसल्याचे समोर आल्याने जरीपटका पोलिसांनी सुटकेचा श्वास सोडला.
मिळालेल्या माहितीनुसार, सोमवारी सायंकाळी ४.४५ वाजताच्या सुमारास पोलिस नियंत्रण कक्षाच्या १०० क्रमांकावर एका युवकाने फोन केला. जरीपटका बस थांबा परिसरात ५० जणांच्या जमावाने पाच युवकांना घेरले. त्यांच्यावर ते शस्त्राने वार करीत आहेत, असे युवकाने नियंत्रण कक्षात तैनात पोलिसांना सांगितले. नियंत्रण कक्षातील पोलिसाने बिनतारी संदेश यंत्रणेद्वारे जरीपटका पोलिसांना याबाबत माहिती दिली. माहिती मिळताच जरीपटका व गुन्हेशाखा पोलिसांसह सुमारे ५० पोलिसांचा ताफा बस थांबा परिसरात पोहोचला. मात्र, येथे पोलिसांना जमाव दिसला नाही. सर्व सुरळीत होते. पोलिसांनी आजूबाजूचाही परिसर पिंजला. नागरिकांकडेही विचारणा केली. शांतता असल्याचे नागरिकांनी जरीपटका पोलिसांना सांगितले. घटनास्थळ दुसरे आहे काय, अशी विचारणा जरीपटका पोलिसांनी नियंत्रण कक्षाला केली.
बस थांबाच घटनास्थळ असल्याचे नियंत्रण कक्षाने जरीपटका पोलिसांना सांगितले. नेमके काय झाले, हे कोणालाही कळायला मार्ग नव्हता. अखेर पोलिसांनी फोन करणाऱ्या युवकाचे मोबाइल लोकेशन तपासले. ते कर्नाटकातील बिजापूर येथील निघाले. पोलिसांनी युवकाच्या मोबाइलवर संपर्क साधला. त्याला स्पष्ट हिंदी बोलत येत नव्हती. क्रॉस कनेक्शनमुळे हा गोंधळ उडाल्याचे स्पष्ट झाल्याने पोलिसांनी डोक्यावर हात मारून घेतला.
