भारतीय संघाने सामना जिंकल्यानंतर वेगवान गोलंदाज मोहम्मद शमी, उमेश यादव आणि इशांत शर्मा या तिघांची एक छोटीशी मुलाखत समालोचक हर्षा भोगले यांनी घेतली. त्यात इशांत शर्माने मोहम्मद शमी याला एक असा प्रश्न विचारला मोहम्मद शमी मैदानावरच हसायला लागला. भारतीय संघ शुक्रवारपासून (२२ नोव्हें) पहिला दिवस-रात्र कसोटी सामना खेळणार आहे. हे सामने गुलाबी चेंडूने खेळावे लागतात. त्यामुळे इशांतला गुलाबी चेंडूबाबत प्रश्न विचारण्यात आला होता. पण इशांतने तो प्रश्न शमीकडे फिरवला आणि त्यात स्वत:चाही एक प्रश्न वाढवला.
“गुलाबी चेंडूने चांगली कामगिरी कशी करावी ते आपल्याला शमीकडूनच चांगल्या पद्धतीने समजू शकेल. मी असं ऐकलं आहे की शमीने गुलाबी चेंडूने खेळताना ११ षटकात ५ बळी टिपले होते. हे असं एखाद्या गोलंदाजाला कसं काय जमतं बुवा… आम्ही फलंदाजांना चकवून आणि स्विंग कंटाळलो आहोत… पण तुला मात्र बहुतेक चेंडूंवर विकेट मिळतात. त्यामुळे आता तू आम्हाला सांगूनच टाक की तू नक्की करतोस तरी काय?” असा प्रश्न इशांतने विचारला.
हा प्रश्न ऐकून शमीलादेखील हसू अनावर झालं. पण त्याने मोठ्या हुशारीने उत्तर दिले. तुमच्यासारख्या (इशांत आणि उमेश) अनुभवी गोलंदाजांची साथ आणि संघ व्यसस्थापनाने दाखवलेला विश्वास याच भरवशावर मी चांगली कामगिरी करतो, असे उत्तर शमीने दिले.
